milliuunilikkaat pineqartut
KNAPK avaleraasartoorniarneq pillugu avoqqaaqataalerput
KNAPK maanna Sulisitsisut aamma Halibut Greenland peqatigalugit aalisarnermut naalakkersuisoqarfiup avaleraasartoorniarnissaq pillugu kigaatsumik sullissineranut avoqqaareqataalerpoq. Aammalu Siumut ataatsimut isornartorsiorpaat
KNAPK aamma Sulisitsisut maanna pisortat avaleraasartuunut pisassanik qinnuteqaatinut tunngatillugu kigaangaatsiartumik sullissinerat ataatsimut nukillalaarnartutut oqariartuuteqarfigaat.
Sullissineq kigaatsoq, maanna ukiuni tulleriinni marlunni uterneqartoq.
- Pisortat avaleraasartuunik pisassiiniaasaarnerat takussutissaanerluni naalakkersuisut Kalaallit Nunaanni aalisarnermik inuussutissarsiorteqartut suliffissanik pilersitsiniarneranni aningaasanillu isaatitsiniarneranni pingaartitsinnginnerannik?
Sulisitsisut aamma piniartut aalisartullu kattuffiat aallarniutigalugu taama oqariartuuteqarput.
Annaasaqaaterujussuit
Taakku kattufferujussuit marluk nukillalaarutigaat pisortat ukioq manna siornamit sukkanerusumik iliuuseqanngimmata, pisassiissutinik agguaassinerit kingusinaartut inuussutissarsiornermik sulialinnut aamma inuiaqatigiinnut annertuumik annaasaqarfioreersullu.
- Tamaammat naalliuummernarpoq takullugu, ineriartortitsinermi aningaasalersuinermillu tapersiisussatut isigisat paasisimanngippasimmassuk taamatut aalisarnermi peqataaniaraanni suut piumasaqaataanersut.
- Maannalu maajip naaneraniippugut, sulilu pisassiissutinik suliaqartunut tunniussisoqarani, naak pisassiineq aallaavigalugu aalisarnerup akilersinnaasumik ingerlannissaanut pilersaarusiornermi pisassiinerit atortussaagaluaraat, KNAPK aamma Sulisitsisut tusagassiuutinut allapput.
Siumut isornartorsiorpaat
KNAPK aamma Sulisitsisut maanna qisuariaateqarput Siumut isornartorsiorlugu, kattuffiit naapertorlugit maanna naalakkersuisuusut siorna ajornartorsiutaasut ilisimammatigit.
- Erseqqissaassutigerusupparput Siumup inatsisartuni gruppiata allakkiamini tamanna aamma isornartorsiormassuk, taamani naalakkersuisuusut suliamik paamarussinerat suliffissanik isertitassanillu annaasaqarnermik kinguneqarmat.
Pisassiisutinuinnarli akissuteqarnissaq naalakkersuisoqarfiup ajornartorsiutiginngilaaq. Aalisartut aamma tupigusuutigaat inuussutissarsiortut saaffinnissutaat akineqarneq ajormata.