Aalisarneq
KNAPK: Arriitsumik annernartumik toqunneqalernerpugut?
Aalisartut nipiartullu kattuffiata isornartorsiuinera WWF-imit ilumuunnginnererneqarpoq
- Immap pissarititaata Kalaallit Nunaata aningaasaqarneranut sunniuteqaaq, nunatta avammut tunisineranut 95 procentimik sunniuteqarluni. Taamaakkaluartorli suliffeqarfiit WWF-itut ittut nunarsuarmioqatitsinnut isumaqalersitsiniarsaripput nungusaataasumik nunatsinni aalisartoqartartoq. Tamanna kinguneraa nunat ilaat nunatsinneersunik piserusukkunnaarnerannik.
Aalisartut piniartullu kattuffiata KNAPK-p siulittaasorigallagaa Leif Fontaine oqarpoq.
Allatani WWF-ip pisortaanut Gitte Seebergimut nassiuppaa, qulequtaralugu 'WWF-ip Kalaallit Nunaat tamaat eqqissisimatitanngortinniarpaa europamiunut takutitassarsiaannanngortinniarlu, taamaattumik annernartumik arriitsumik toqunneqalernerpugut?'
Mailimi ilaatigut ima allappoq:
- WWF isumaqarpoq qalerallit tamaasa nungunneqalersut. WWF-ip ilisimasaqanngissutsi takutiinnarpaa. Aammattaaq WWF-imit oqaatigineqarpoq nunatta sineriaani qalerallit nungulersut akornanni qaleralinniartoqartoq, Upernaviup eqqaa toqqaannartumik oqaatiginngikkaluarlugu WWF-ip allaffeqarfiani Schweizimiitumi pineqarpoq.
WWF-ip eqqortuusorinngilaa
KNAPK-li kukkusutut nalilerneqarpoq.
Qalerallit nungungajalinngitsut WWF-imit oqaatigineqarpoq.
Aalisariaatsit akuerineqanngitsut ilaat - soorlu Kalaallit Nunaanni - pisiarineqartussaanngitsutut nalilerneqartarput, soorlu Schweizip Kalaallit Nunaata qaleraliinik pisiumanngitsoq.
Biologinit siunersuutigineqartut aamma qaangerlugit aalisartarnerit WWF-imit akuerisaaneq ajorput, siunissami aalisagassat ikinnerunissaat iluarineqanngimmat.