KNAK siulittaasua nunanut allanut sungiusaasoq soraarseriarlugu tunuartoq

KNAK-p tusagassiuutinut nalunaarutaa nutaaq tamakkiisumik saqqummiupparput:

Tekle Ghebrelul nunanut allanut unammisartut sungiusaasuatut soraarsinneqassasoq, KNAK-mi siulersuisut amerlanerussuteqartut aalajangerpaat. Taamatut aalajangerneq Kalaallit Arsaattartut Kattuffiani siulittaasutut peqataaffigisinnaanngilara.

Tusatsiakkat uppernarsaatissaqanngitsut aallaavigalugit soraarsitsineq pivoq. Pisup ingerlanera sapinngisannik allaaseralugu ersersinniarsarissavara.

Tekle Ghebrelul upernaaq Maniitsumi ammip qalipaataanik immikkoortitaalluni pineqarnermini ilaatigut isiginnaartunut kusanaatsumik iliorsimanera, meeqqamut akerartuisimanera aammalu oqqannermut ilanngussimanera pillugit mianersoqqussummik tunineqarsimavoq. Tusakkat aallaavigalugit KNAK-p ataani nunanut allanut unammisartunut sungiusaasuunera tunngavingalugu mianersoqqussummik tunineqarpoq.

Tekle Ghebrelulimillu asseq kingulleq aapakaanik bananinillu emojilersorlugu assiliisua Facebookimini nassuerutigisimavaa aammalu KNAK-mulli nassuiaatingalugu taanna nammineq assilisani emojilersoriarlugu snapchatiminut ilisimallugu. Taassuma kukkusimanini nassuerutigaa taamatulli pisoqaqqissannginnerarlugu, kisianni taamaaliornini ajortumik tunngaveqannginnerarpaa. Taamaakkaluartoq KNAK-p pisumut isiginninnera sakkukillisimanngilaq taannalu unammeqataasinnaajunnaarsillugu.

Tassunga tunngatillugu taanna KNAK immikkoortitsinerarlugu pisuutippaa, Tekle Ghebrelulillu Maniitsumiinnermini nukappiaqqamut tunngatillugu kinguneqartitsisimannginneralugu. Tamannalu ilumuunngilaq, upernaarmi aalajangiisoqarsimavoq, aalajangernerlu Kâgssagssuup siulittaasuanut/sungiusaasuanut allaganngorlugu nalunaarutigineqarsimavoq.

Isikkamik arsaattartuni dommerip Michael Jensenip Facebookimi allassimasaa, nunanut allanut unammisartunut sungiusaasoq
B-67-mi sungiusaasuulluni Kâgssagssummut unammillutik B-67-p isertitsinerani Kâgssagssuup sinaaniittuinut qiterliminik nittarsaassisimasutut assuarinnissimanera, siulersuisut aalajangiinerminni tunngavilersuutigisimavaat.

Pisoq tamanna KNAK-mut nalunaarutigineqarsimanngilaq, Michael Jensenilu Nunatta avataanut angalasoq nalunaarutiginneqqullugu kaammaattorneqarsimalluni. Tassani Michael Jensenip qiterlermik nittarsaassisumik takunnissimanini uppernarsarsinnaasimanngilaa, kisianni "arlalinnik nassuiarneqarsinnaasumik" takusaqarsimanini "fuck you-tutut" naliliinnarsimavaa, taamaattoqarsimanerali Tekle Ghebrelulip eqqumiigivaa. Unamminermi dommeriusup, Kâgssagssuup sinaanittuisa, unammersuarnermi aaqqissuisunit, B-67-p sinaanittuinit allanilluunniit taama ittumik takunnittoqarsimanngilaq. Taamaasilluni taama pisoqarsimangaaneq imminut assortoraluartoq KNAK-p siulersuisuisa amerlanerussuteqartut Michael Jensenip saqqummiussaa akueralugu soraarsitsinermi tunngavilersuutigaat.

Uanga nammineq Tekle Ghebrelul sungiusaasutut ilungersortutut sapaatit-akunnerit tamarluinnaasa nunanut allanut unammisartut Nuummilu piginnaasaqarluartut sungiusaqatigiinneranik aaqqissuisartutut ilisimavara. Sungiusarnermi atisanik sungiusareernermilu aqajarormiussanik taanna isumaginnittuuvoq. Sungiusarnermik ataqqinnilluarnissaq annertuumik piumasaqaatigisarpaa. DK-mi nunanilu allani suleqatinut attaveqaatinik pilersitsisimavoq. Tekle Ghebrelulillu sukataarneranut aningaasaleerusussuseqartunut attaveqaammik pilersitsimalluni. Taanna timersuutip nuannareqisatta ineriartortitseqataaffigisimavaa sulilluarsimaqalunilu.

Isumaqarpunga kalaallit isikkamik arsaannerisa iluani kikkut tamarmik inissaqartinneqassasut, timersuutilli ineriartortinneqarnissaanut, tusatsiakkat Facebookimiluunniit iliuutsit aallaviginangit, nukittuumik aaqqissuussaanikkut inissisimasariaqarluta.

Tamanna tunngavingalugu Kalaallit Nunaani Arsaattartut Kattuffianit aliasuutigeqisannik tunuarpunga, John Thorsen tusagassiuutinut nalunaarummi nutaami allappoq.

Aamma atuaruk: Nunanut allanut unammisartunut sungiusaasoq tupaqqasoq: Soraarsitaavunga