Friday, August 4, 2017 - 13:41

KNAK-p siulittaasua: Sungiusaasunngortussap unammisartut aalajangiiffigissavai

Assi.: Knud Fl. Larsen
Kikkut nunanut allanut unammisartuussanersut Kalaallit Nunaani Arsaattartut Kattuffiani siulersuisut aalajangerneqarneq ajortut, KNAK-mi siulittaasup Gert Fleischerip oqatigaa.

- Unammisartut kaammattuuteqarnerat tusaatissatut tiguarput.

Kalaallit Nunaani Arsaattartut Kattuffiani siulittaasoq Gert Fleischer, isikkamik arsaallutik nunanut unammisartut ingerlaannassanerlutik eqqarsalersimanerisa kingorna oqarpoq.

Unammisartut 20-t siulersuit tunuarnissaat neriuutigalugu aammalu nunanut allanut unammisartuuginnassanerlutik eqqarsaatersuutigalugu, tusagassiuutinut nalunaarummi allapput.

Taarserneqarsinnaasut

- Nunanut allanut unammisartut taakkut kisimik nunatsinni arsaattartuunngillat. Taakku unammisartunik allanik taarserneqariaannaapput. Unammisartut qisuariaataat ataqqivarput, kisianni siulersuisut unammisartut siunissaat aalajangersinnaanngilaat, tamanna nunanut allanut unammisartunut sungiusaasunngortussap aalajangingassaraa.

- Aamma takusinnaavarput nunanut allanut unammisartut arlallit peqatigiiffimmit aalajangersimasuminngaanneersut. Katillugit 16-pput. Malunnarpoq kalaallit piukkunnaatilippassuit unammisartuniinngimmata, Gert Fleischer oqarpoq.

Siulersuisut aalajangiineq ajortut

- Taava isumaqarpit unammisartut amerlavallaat peqatigiiffimmit aalajangersimasuminngaanneersut?

- Aap, taama isumaqarluinnarpunga. Tamanna KNAK-mi eqqartortarsimavarput. Nunanut allanut unammisartunik toqqaanermi, nuna tamakkerlugu isiginiarneqarneq ajorpoq. Taamaammat tupigusuutiginngilarput unammisartut nunanut allanut unammisartuuginnassanerlutik eqqarsaateqalersimappata, Gert Fleischer nassuiaavoq. Taassuma unammisartut amerlanerusut sineriammiit unammisartunut toqqangaasalernissaat sulissutiginiarpaa.

Kisianni nunanut allanut unammisartunut sungiusaasunngortussap kikkut toqqarneqassanersut nalilingassaraa, taanna oqarpoq.

- Nunanut allanut unammisartumik sungisaasussamik suli ujaasinngilagut. Kina nunanut allanut unammisartunut piukkunnarnerunersoq nalilersoqqaassuarput, Gert Fleischer oqarpoq.

Seneste nyheder / Nutaarsiassat kingulliit