Sungiusaasumik soraarsitsineq
KNAK-mi siulittaasuusimasup John Thorsen isornartorsiorpaa
Lars Lundblad, Kalaallit Nunaani Arsaattartut Kattuffiani siulittaasuusimasoq, John Thorsenip KNAK-mi atorfimminit tunuarnera tupaallaatigaa. - Sinniisut ataatsimeeqqilernissaanut utaqqisimasinnaangaluarpoq, Lundblad oqarpoq
John Thorseni Kalaallit Nunaani Arsaattartut Kattuffiani siulittaasuuffimminit tunuarnissani utaqqitissimasinnaangaluarpaa.
KNAK-mi siulittaasuusimasoq, Lars Lundblad isumaqarpoq, taassuma John Thorsenip sooq tunuariasaarnera paasisinnaanngilaa.
- KNAK-mi siulittaasup John Thorsenip KNAK-mi amerlanerussuteqartut aalajangiussaat (6-1) ataqqillugu akuerisinnaanngimmagu aliasuutigaluguli tupaallaatigaara, Lars Lundblad tusagassiuutinut nalunaarummi allappoq.
Atuaruk: KNAK siulittaasua nunanut allanut sungiusaasoq soraarseriarlugu tunuartoq
Tunuarnissani utaqqitissinnaangaluaraa
John Thorsen sapaatip-akunnerata siuliani siulersuisut nunanut allanut unammisartut sungiusaasuat Tekle Ghebrelulimik soraarsitsinerat akerleralugu KNAK-mi siulittaasuuffimminit tunuarpoq.
- Aalajangerneq taassuma isumaa malillugu eqqortuunngippat taanna (John Thorsen aaqq.) sinniisut ataatsimeeqqilernissaannut tunuarnissani utaqqitissimasinnaangaluarpaa. Tamanna ataqqinarnerusimassangaluarpoq, Lars Lundblad oqarpoq.
Atuaruk: Nunanut allanut unammisartut peqataajunnaarnissartik eqqarsaatigaat
Aalajangerneq ataqqingaa
Taannami isumaqarpoq siulersuisut demokrati atorlugu qinerneqarsimasut assigiinngitsunik aalajangiinissamik suliaqarnissaq akisussaaffigingaat.
- Aalajangiinerit taama ittut paasissutissanit saqqummiuneqartunit aalajangerneqartarput. Immikkulli malunginiarneqassaaq inuit ataasiakkaat pineqartillugit paasissutissat tamanut saqqummiunneqarsimannginneri, taanna tikkuaavoq.
Taamaammat Lars Lundblad kaammaatuivoq kalaallit isikkamik arsaannerinut tunngatillugu KNAK-p siulersuisuisa tamanit taperserneqarnissaa, Nunatsinnilu timersuutip ineriartortinneqarneranut suliaqarnerat ataqqillugu.
- Ukiuni arlalinni timersornermi aqutsisutut / sungiusaasutut, ingammik isikkamik arsaannikkut tulluarsorivara kikkut tamaasa najoqqutassat demokratiskimit pilersinneqarsimasut, tassa kalaallit isikkamik arsaattartut peqatigiiffiinut atuuttut, ataqqineqarnissaannik kaammattuissallunga, Lars Lundblad oqarpoq.
Nunanut allanut unammisartunut sungiusaasumik soraarsitsineq pillugu sammisat uani atuakkit