Sungiusaasumik soraarsitsinerup kingorna
KNAK aningaasaliisartunik annaasaqariaannaavoq
Piffissami kingullermi perulluliortoqarnera, ilaatigut sungiusaasut marluk taamaatissimanerat siulittaasulli tunuarsimanera pillugit, Elite Sport Greenlandip siulittaasuata Malik Hegelund Olsen, KNAK-mi siulersuisut ataatsimeeqatigerusuppai. Pikkorilluinnartunulli kattuffiup KNAK-mut aningaasaliisartuunginnarnissaa apeqqutaalerpoq, KNAK-mmi anguniakkatik angusinnaaneraat qularutigineqarmat.
- Kalaallit Nunaani Arsaattartut Kattuffianut aningaasaliisartutut ulluinnarni aqutseriaasiannut attuumassuteqanngilagut. Taamaattoq kattuffiup anguniakkatik angusinnaanerat paasissallugu soqutigisaraarput. Soqutigisarpummi tassaniippoq, tassalu siunissami kattuffimmut aningaasaliisuuginnassanersugut, Elite Sport Greenlandimi siulittaasoq Malik Hegelund Olsen Sermitsiaq.AG-mut oqarpoq.
Elite Sport Greenlandi inuit ataasiakkaanut suliat pillugit akulerunneq ajortoq, Malik Hegelund Olsenip oqaatigaa.
- Kisianni siunissami aningaasaliisuunginnassanerluta naliliisoqassatillugu iliuuseqartarpugut, kattuffiulli anguniakkatik naammassisinnaanerat paaserusuttarparput, Malik Hegelund Olsen erseqqissaavoq, kattuffiulli sapaatip-akunnerata tulliani KNAK-mi siulersuisut oqaloqatigissamaaraat paasissutissiaraa.
Atuaruk: KNAK: Timersortartorpalaannginneq Teklep soraarsitaaneranut pissutaavoq
Oqaaseqarumanngitsoq
- KNAK-mi pisut kingulliit qanoq isumaqarfigaangit?
- Oqaaseqarfigissanngilara, taanna oqarpoq.
- Elite Sport Greenlandip aningaasaliisartutut qanoq iliornikkut killilerneqarsinnaava?
- Kattuffiit imalunniit inuit ataasiakkaat malitassaanik isumaqatigiissusiortarpugut. Isumaqatigiissutineqarsimasulli malinneqarsimanngippata, Elite Sport Greenlandi aningaasaliisarnini unitsissinnaavaa. KNAK qanimut suleqatigalugu isumaqatigiissusiorsimavugut. Kattuffiup suna anguniangassarineraa uagut sunniuteqarfigisinnaanngilarput. Massakkulli anguniangaapput pikkorilluinnartunik suliniuteqarneq, immikkut piginnaanilinnik ineriartortitsineq aammalu piginnaasanik ineriartortitsineq.
Atuaruk: Nunanut allanut unammisartunut sungiusaasoq tupaqqasoq: Soraarsitaavunga
Piumasaqaatit malinneqassasut
- Immikkoortut taakku aalaavigalugit kattuffimmut aningaasaliissuteqartussanngorluta isumaqatigiissuteqarsimavugut. Tamatuma saniatigut ileqqorissaarnissaq pingaartitaraa. Kalaallit Nunaani Timersortartut Kattuffia pingaartitaqarpoq kattuffiit tamarmik malitassaannik. Tamanna aamma Elite Sport Greenlandimit piumasaqaatigaarput. Piumasaqaatit taakku malikkaanni aningaasaliinerput ingerlaannassaaq, Malik Hegelund Olsen nassuiaavoq.
Aamma atuaruk: Futsalimi unammisartunut sungiusaasoq taamaatippoq: GBU-mut tatiginninngilanga
Elite Sport Greenland aamma Kalaallit Nunaani Arsaattartut Kattuffia allaqatigiinnikkut oqaloqatigiittut, taanna paasissutissiivoq. Sapaatip-akunneratali tulliani naapeqatigiissapput, tassani KNAK susoqarsimaneranik nassuiaateqassalluni.
- Elite Sport Greenlandimit neriuutigaarput kattuffiit tamarmik ingerlalluarnissaat, aammalu pitsaasumik oqaloqatigiissinnaanissarput. Taamaammat KNAK attaveqarfigisimatinnagut nalunaaruteqarusunngilagut, aamma pisoq tusagassiuutitigut oqallisigerusunngilarput, Malik Hegelund Olsen oqarpoq.
Aamma atuaruk: KNAK siulittaasua nunanut allanut sungiusaasoq soraarseriarlugu tunuartoq