Pan Amerikanske Mesterskaber
KNAAK Nunafondenimut 1 million koruuninut isumaqatigiissuteqarfigaat
Kalaallit Nunaanni Assammik Arsaattartut Kattuffia Amerikap nunavittaani angutit assammik arsarlutik pissartanngornissaannut ukiup tulliani Nuummi ingerlanneqartussaq pillugu, Nunafonden 1 million koruuninik isumaqatigiissuteqarfigaat
Ukiup tulliani juunip qaammataani Amerikap nunavittaani angutit assammik arsarlutik pissartanngorniunnerannut Kalaallit Nunaat qaaqqusisuussaaq.
Kalaallit saniatigut Amerikap avannaaniit, Amerikami akullermiit Amerikamillu kujallermiit holdit aqqanillit peqataassapput, assammillu arsallammassuit Kalaallit Nunaaniissallutik.
Unammersuarnermi unammisartoqatigiit inissilluarnerpaat nunarsuarmi pissartanngorniuttoqarnissaanut toqqaannartumik anngutissapput.
Pissartanngorniunnerit ingerlanneqarnissaat ilaatigut Assammik Arsartartut Kattuffianit, Namminersorlutik Oqartussanit, Kommuneqarfik Sermersuumit, Elitesport Greenlandimit, Nunatsinni Timersoqatigiit Kattuffianit allanillu inuinnarnit namminersortunit tunissuteqartunillu aningaasaliiffigineqarput.
Septembarimi Nunafonden 1 million koruuninik tapiinermigut tapiisunut ilanngunnissamik isumaqatigiissuteqarfigineqarpoq.
- Una pisussaq immikkuullarissuuvoq nuannerluinnarlunilu, timersornermik, peqatigiiffeqarnermik, inuussutissarsiortunut minnerunngitsumillu tamatsinnut kajumissutsitsinnik sulisuusunut isiginnaartunullu iluaqutaasussalluni. Nunafondenimiit neriuutigaarput tapiinerput aningaasaliisinnaasunik allanik pissarsiornermi iluaqutaassasoq, taamaalilluta kalaalliusugut aaqqissuussamik taamak annertutigisumik suliaqarsinnaanerput nunarsuarmioqatitsinnut takutissinnaallutigu, Vivian Motzfeldt Nunafonden sinnerlugu oqarpoq.
Unammersuarnissat piareersarneqaleruttorput, sulilu suleqatigiinnissamik aningaasaliinissamillu isumaqatigiissuteqarnissamik annertuumik pisariaqartitsisoqarpoq, naak missingersuutini 15 million koruunit missaasa amerlanersaat qulakkeerneqareeraluartut.
Suliniummi aqutsisoqatigiit nalunaarutigaat katillugit unamminerit 42-t internetikkut aallakaatinneqassammata, TV-kkullu aallakaatitsisinnaanissaq TV-qarfinnut tuniniarneqassalluni.
- Taamatut nittarsaanneqarneq Nunatsinni nutaarluinnaavoq Nunattalu nunarsuup sinneranut tuniniarnissaanut immikkut ittumik periarfissaqalerluta, assammik arsaattartut kattuffiat allappoq.
Unammersuarnerit juunip 15-aniit 25-anut Nuummi ingerlanneqassapput. Inussivimmi Illorsuarmilu Timersortarfimmi unammisoqartassaaq, naatsorsuutigineqarporlu kajumissutsiminnik sulisut 150-t missaaniittut timersortartunik, dommerinik, sungiusaasunik assigisaannilllu peqataaniarlutik Nuummukartunut ikiuuttussatut pisariaqartinneqassasut.