Pujortartarunnaarit
Klasse Pujortarfiunngitsoq 2015-imi ajugaasut aajuku
Unammisitsinermi klassit katillugit 12-t peqataapput
Peqqissutsimut Naalakkersuisup Doris Jakobsenip (S), Klasse Pujortarfiunngitsoq 2015-imi ajugaasut toqqarpai.
Akissarsiassaq anneq 30.000 koruuninik aningaasartalik Akunnaami Aadap Atuarfiani 1. - 8. klassimi atuartut pissarsiaraat, akissarsiassallu tullia 15.000 koruuninik aningaasartalik Tasiilami Alivarpimmi 6.x-imi atuartunut tunniunneqarpoq.
Inersimasut akisussaassuseqarnerat
Ukioq manna Klasse Pujortarfiunngitsumik unammisitsinermi sammineqarpoq inersimasut akisussaassuseqarnerat. Peqqissutsimullu Naalakkersuisoqarfik pujortannginnissamik paasisitsiniaanerup qanoq ittuusinnaaneranik siunnersuutinik kusanartorpassuarnik isumassarsiorfiusunillu tigusaqarsimavoq, naalakkersuisoqarfik erseqqissaavoq.
Takussutissiat kusanartut
Aadap Atuarfiani 1. - 8. klassimi atuartut ajugaatinneqarput makkua tunngavilersuutigalugit:
Atuartut plakatinik kusanartunik takussutissiorsimapput, ilaatigut takutillugu pujortartarnerup timimut ajoqutigisartagai.
Atuartut isumassarsiorlutik nutaamillu eqqarsarlutik fagini assigiinngitsuni arlalinni unammisitsineq sammisimavaat. Ilaatigut sikaritsikunik katersuisimapput, kisillugit naatsorsorlugulu sikaritsit aningaasanik qanoq amerlatigisunik akeqarsimanersut.
Atuartut illoqarfimmi pisiniarfik meeqqerivillu akulerutsissimavaat suleqatigiilluni pujortatsaaliussinermi, taamaasillutillu paasisitsiniaanerup nalunaajaataa annertunerusumut ataqatigiissillugu eqqarsaatigisimallugu.
Oqaluttualiaq
Tasiilami Alivarpimmi 6.x-imi atuartut akissarsiassap aappaanik tunineqarput makkua tunngavilersuutigalugit:
Atuartut oqaluttualiorsimapput pitsaasumik ileqqorissaarnertalimmik nalunaajaatilimmillu, meeqqanit inersimasunillu paasineqarsinnaasumik.
Oqaluttualiaq nutaamik eqqarsarluni siammarsaariaasiuvoq, isumassarsiorluni atortut, qalipaatit assilialiallu kusanartut atorlugit unammisitsinermi sammisaq nuannersumik paasiuminartumillu takutillugu.
Saqqummersinneqassapput
Ajugaasut paasisitsiniutaat piffissami decembarip 16-iannit 2015 januaarip 13-iannut 2016 Nuummi Nunatta Atuagaateqarfiani saqqummersinneqassapput.