ilisineq
Kitsia Berthelsen toquvoq
Nuummi innuttaasut utoqqaanersaat Kitsia Berthelsen Hans Egedep Oqaluffianit arfininngornermi ilisaavoq
Kitsia Berthelsen, sivisuumik napparsimareerluni, marlunngorneq juunip 14-ianni toqukkut qimaguppoq, 94-inik ukioqarluni, Kommuneqarfik Sermersooq eqqaaniummi ilisimatitsivoq.
Kitsia Berthelsen Maniitsumi januaarip 25-ani 1921-mi inunngorpoq inuusuttuullunilu Nuummut nuussimalluni.
Kitsia Berthelsen inuunini tamaat peqatigiiffilerinermik annertuumik ingerlataqarsimavoq.
Peqatigiinniani ukiorpassuarni ilaasortaasimavoq, siulittaasutullu inissisimasimalluni.
Ukiullu arlallit aamma Nuummi ilagiit sinniisaanni suleqataasimalluni, piffisallu ilaani aamma Nuummi Ilagiit Sinniisaanni siulittaasuusimalluni.
Kitsia Berthelsen kalaallisuuliornermik suliaqartarsimaqaaq. Ataqqinartorsuarmut Dronning Margrethemu nuilaqusiornikuuvoq 1960-imi Prinsessiulluni Kalaallit Nunaat siullermeerluni tikeraarmagu. Dronningip ullumikkut nuilaqutai aamma Kitsia Berthelsenimit suliaapput.
Ikinngutaasa ilaqutaasalu Kitsia Berthelsen eqeersimaartutut isigaat inoqamminullu annertuumik uummatilittut isigalugu. Tukkortuusimavoq inoqamminullu soqutiginnilluartuulluni, kommuni eqqaaniummi paasissutissiivoq.
Nuummi innuttaasut arlallit ulitaliortarnera pillugu ilisimalluarpaat nalunngisanilu tamangajalluinnaasa tuniorartuartarsimallugit.
Juullilerneri tamaasa Kitsia Berthelsenip Kalaaliaraq alakkartuartarpaa kaagiliaminik ulitaliaminillu pajulluni.
Kitsia Berthelsen arfininngornermi Nuummi Hans Egedep Oqaluffianiit ilisaavoq, tamatumalu kingorna Nuummi Utoqqaat Illuanni Kitsia Berthelsenip ukiuni kingullerni najugaqarfigisaani kaffillertoqarluni.