Kisitsisit Royal Greenlandimut pingaarutillit
Royal Greenland ukiumut naatsorsuutit angusarissaarfiusoq sisamanngormat saqqummiuppaa, ileqqullu malillugit kisitsiserpassuarnik imaqarpoq. Suliffeqarfimmili ukumut naatsorsuutit kisiisa atorneqarneq ajorput. Assersuutigalugu qalerallit niaqui qanoq amerlatigisut 2017-imi kangiamiut suppiliaanni nerisassiaanniluunniit atorneqarsimanersut takukkit
Kisitsisinik takunnissinnaanngikkuit una qupperneq qimallugu allaaserisamik allamik atuarit. Allaaserisamimi uani Royal Greenlandip kisitsisaatai kisimik sammineqarput.
Ilisimasat
Namminersorlutik Oqartussat aalisakkeriviutaat suliffeqarfiup kisitsisaataanik pikkorinnerulersinniarluta ujartuilluarsimavoq. Kisitsisillu atorlugit umiarsuaatit annersaat ulluinnarmi sunik suliaqartarnersoq paasineqarsinnaavoq.
Aallartitta:
Ilinniartut ilinniakkamillu ingerlatsisut pikkorissut 51-it Royal Greenlandip nunarsuarmi tunisassiorfiini allaffiinilu suliffimmik misiliillutik sulipput.
Tunisat allagartaat 82.234-t pisisartunut 1.533-nut suliffeqarfissuup tuniniaanermut immikkoortortarpassuinit nassiunneqarput.
Aalisakkat qaleruallillu 12.500.000 kiilut Newfoundlandimi aalisartunit tunineqarput.
Nioqqutissat naammasseriikkat 111.448 tonsit pisisartunut nunanit
48-neersunut tunineqarput.
Innuttaasut peqqissusaannut iluaqutaasumik raajanik seernartulikkanik tunisassiornermi taratsunik 9%-inik atuinikinnerusoqarpoq.
Kalaallit Nunaanni sulisut 753-it piginnaasaat qaffassarniarlugit ulluni pikkorissartitsiffiusuni 179-iusuni peqataapput.
Aalisartut 1.963-it aalisagartatik Kalaallit Nunaanni Royal Greenlandimut tunivaat.
Royal Greenlandip kaaviiaartitai katillugit 5.613 milliard koruuniupput taakkulu 99,4%-ii avammut tunisinikkut kaaviiaartitaapput.
Qalerallit niaqui 6.209.813-it suppaliassatut allanillu nerisassiornermut atugassatut Kangianut tunineqarput.
Agguaqatigiissitsinikkut naatsorsuineq
Ukiumut naatsorsuutinit qalerallit niaqui qanoq kisinneqarsimanersut allaassimanngilaq, Royal Greenlandili paasissutissiivoq:
- Qalerallit niaqui agguaqatigiisinnerini oqimaassusiat qalerallit niaquinik tunisarineqarsimasunut agguarneqassapput, Niels Wann tunisassiornermut pisortaq Sermitsiaq.AG-mut oqarpoq.