atorfiit ilinniarnerlu
Kisitsisit: Inuusuttut sulisut aamma ilinniartut ikinnerusut
Naatsorsueqqissaartarfiup inuusuttut ilinniarnerannut aamma suliffeqarnerannut tunngasut, kisitsisit alianartut ineriartornerat saqqummiuppaat. Qeqqata Kommunia inuusuttunik amerlanerpaanik aallutaqartitsillaqqinnerpaavoq
Ukiut arfinillit matuma siornamut sanilliullugu, inuusuttut ilinniartut aamma sulisut ullumikkut procentinik arfinilinnik ikinnerupput. Naatsorsueqqissaartarfimmit kisitsisit nutaat saqqummiunneqartut tamanna takutippaa.
2014-ip naanerani kalaallit inuusuttut 16-it 25-illu akornanni ukiullit 5.795-it imaluunniit 65 procentii ilinniarfinnut suliffeqarfinnulluunniit atassuteqarput.
Procentinik arfinilinnik ikinnerusut
Inuusuttut pineqartut 614-it Kalaallit Nunaata avataani efterkolenik ilinniakkanillu ingerlataqarsimapput.
Kalaallit Nunaanni inuusuttut najugaqavissut qiviassagaanni 62 procentii ilinniakkanik ingerlataqanngikkunik suliffeqartuupput.
Taakkua amerlassusaat 2009-imut sanilliullugu procentpointinik arfinilinnik ikileriarsimapput.
Ukiut ingerlanerini najugaqavissut amerlassusaat allanngorsimavoq, amerlassusaallu ikinnerpaagamik 2014-imi 8.034-iupput.
Inuusuttorpassuit susassaqanngitsut
Inuusuttut najugaqavissut 16-it aamma 18-it akornanni ukiullit qiviaraanni, 2014-ip naanerani 567-it imaluunnit 27 procentii ilinniartuupput.
Inuusunnerpaat 1.075-it atuaratillu suliffeqanngillat. Taakkulu eqimattat, innuttaasut aamma qinikkat akornanni ernumassutigineqaleraluttuinnarput.
Taakku 2009-imut sanilliullugu procentinik arfineq-pingasunik amerleriarsimapput.
Kisitsisinik takussutissiami nutaami aamma kommunit sisamaasut takuneqarsinnaapput. Tassani takuneqarsinnaavoq, inuusuttut susaqanngitsut Qeqqata Kommuniani ikinnerpaasut.
Uani ataani kisitsisinik takussutisiat kingulliit takuneqarsinnaapput