qinersineq
Kisimiilluni qineqqusaartoq: Partiit tamarmik inuuniutigalugu politikkeriupput
Inatsisartunut qinersinermi qinerneqarpallaarnikuunngikkaluarluni Max Madsen qineqqusaaqqissaaq. Inatsisartunut novembarip 28-ani qinersinissami qineqqusaaqqissaaq
Sermitsiaq.AG-mi atuartartut maluginiarnikuusimassavaat Max Madsen isummersortuni akuulluartartoq. Politikkikkut ingerlatsisunik annertuumik isornartorsiuisarpoq.
Inatsisartunut qinersinerni kingullerni marlunni 50-nik ukiulik Max Madsen kisimiilluni qineqqusaarpoq. Inatsisartunut qinersinermi novembarip 28-ani qinigassanngorteqqissaaq.
- Max Madsen, Inatsisartunut qinersinissami sooq inuit qinissavaatsit?
- 1) Allannguutinik tunngaviliisoqartariaqarpoq. Kulturikkut paasinnittaaseq sammineqartariaqarpoq, kikkut tamat oqartussaaqataanerat atorluarneqartariaqarpoq kiisalu inuuniutigalugu politikkerit annikillisarneqartariaqarput. 2) Suut atorfissaqartinneqarnersut qitiutillugit allannguisoqartariaqarpoq. Kikkut tamat oqartussaaqataanerat Benjaminip Sakæusillu paasisinnaasaannik politikkerit ilisimasaqarnerulernissaat. 3) Qangaani pisimasut ilinniarfiunissaat, kiisalu ataatsimut isiginnittaaserput ineriartortinneqarnissaa.
Politikkikkut misilittagaqanngitsoq
- Politikkikkut qanoq misilittagaqarpit?
- Misilittagaqanngilanga, kisianni pingajussaat qinigassanngortippunga, Max Madsen oqarpoq.
- Partiimi pituttorsimanak Inatsisartunut qineqqusaaqqipputit. Qulingiluanit qinerneqarputit Inatsisartunut qinersinermi 2013-mi kiisalu arfineq marlunnit qinerneqarlutit 2009-mi qinersinermi. Qanoq amerlatigisunik qinersiseqarniarlutit anguniagaqarniarpit aamma politikkikkut suut sunniuteqarfiginiarpigit?
- Qinersinermi qanoq qinerneqartigissanerlunga anguniagaqanngilanga. Naleqartitakka qineqqusaarutigissavakka aamma imminut tatigissaanga. Kulturikkut tunngasut qineqqusaarutigissavakka, taakkumi uannut qaninnersaapput.
- Partiit sorliit qinersisaanit qinerneqarnissat neriuutigaajuk?
- Inuuniutigalugu politikkerinit qinersisussaanngitsunit.
- Politikkikkut suna aallaavigaajuk?
- Maannakkut nunatta politikkikkut aallaavia malillugu saamerlermi inissisimavunga.
Kikkut tamat oqartussaaqataanerat
- Partiinik suleqateqarusussinnaavit?
- Naamik. Naleqartitat nutaat saqqummiukkusuppakka, inuuniutigalugu politikkerinik ikilisaarusuppunga kiisalu kikkut tamat oqartussaaqataanerat annertusarusuppara.
- Partiit sorliit suleqatigerusunngiligit?
- Kiffaanngissusera atorlugu sulissaanga.
- Inatsisartuni partiilersuunneq qanoq isumaqarfigaajuk?
- Inuuniutigalugu politikkeriumasut taamaasiortuupput. Allannguerusussuseqanngillat. Nutaamik eqqarsartaaseqartoqalinngippat partiimi issiatinneqartut allanngortinneqartariaqanngillat.
- Tamanna qanoq allanngortikkusuppiuk?
- Qanoq iliuuseqartoqarnissaanik siunnersuinikkut. Suleqatigiittoqalernissaa aallartisartariaqartoq, politikki kisimi eqqarsaatiginagu kisianni inuiaqatigiit eqqarsaatigalugit. Politikkimi pitsaasumik angusaqarusussutsimik minnerpaamik ataatsimik siunnersuuteqartoqartariaqarpoq, tassa nunaqarfiit, illoqarfiit siammasinnerusut aamma illoqarfiit anginerusut.
- Naggataatigut. Nittartakkatsinni annertuunik isummersuuteqartarputit, politikkerit inuuniutigalugu politikkeriusut isornartorsiortarpatit. Inatsisartunut qinigaassagaluaruit assinganik isornartorsiorneqaruit qanoq iliuuseqassavit?
- Ajunngitsumik tigussavara. Iliuutsikka pissusilersuutikkalu uanga nammineerlunga akisussaaffigaakka, Max Madsen oqarpoq.