upperisaq

Kirkeministerip Danmarkimi kalaallit ilagiit pilersinneqarnissaat tapersersorpaa

Kirkeministerip Mette Bockip kalaallinut Danmarkimiittunut ilagiinnik ataatsinik arlalinnilluunniit pilersitsisoqarnissaa tapersersorpaa

Palaseqarfimmi palasip Oline Berthelsenip Danmarkimi kalaallit ilagiit kisimiilluni sullittarpai. Taanna Aarhusimi oqaluffimmi Vor Fruemi palasiuvoq Danmarkili tamakkerlugu kalaallinut palasiulluni.

Kalaallit Danmarkimiittut immikkut ittumik inissisimanerat Kirkeministerip Mette Bockip uppernarsarpaa, Danmarkimilu kalaallit ilagiivinik pilersitserusullutik peqatigiiffiup kissaateqarnera tapersersorpaa.

- Kalaallinut Danmarkimi najugalinnut ilageeqarnermut tunngasut aalajangiiffigineqarpata kalaallinut ilagiinnik ataatsinik arlalinnilluunniit pilersitsisoqarnissaanut tapersersuinissara oqaatigerusuppara, kirkeministeri ilagiinnik kalaallinut pilersitsisoqarnissaanut tunngasumik §20-mik apeqquteqaammut akissuteqarnermini taamatut akissuteqarpoq.

Inatsit periarfissiissaaq
Inatsimmi paragrafi ilageeqarnermut tunngasoq tusilartut immikkut ilageeqarnissaannut ammaassisuuvoq, pissutigalugu ”immikkut atorfissaqartitsisunut ilagiit siunnersuisuinik pilersitsisoqartarmat".

Kirkeministerip siunnersuutaa kalaallit Danmarkimiittut Danmarkimi immikkut inissisimammata palasinik kalaallisut oqaasilinnik amerlanerusunik peqalernissaanik periarfissiivoq.

- Nunanut allanut ministerip akissutaanut innersuussisinnaavunga ... Tassani allaqqavoq nunanut allanut ministeri isumaqartoq kalaallit immikkut ittumik inissisimasut, taamaasillutillu kalaallit Danmarkimiittut ilageeqarnissaminnut innuttaasutut pisussaaffeqartut. Taassuma ilutigisaanik Kalaallit Nunaat naalagaaffeqatigiinnermi ilaavoq, taamatullu inissisimatillugu nunanit allaneersunut allanut sanilliullugit immikkut inissisimasutut taaneqarsinnaallutik, kirkeministeri naqissusiivoq.

Isumaqatiginninniarnerit ingerlapput
Kalaallit ilageeqalernissaat anguniarlugu Kirkeministeriaqarfik aamma Namminersorlutik Oqartussat suleqatigiinnerisigut aaqqiisoqarniartoq Kirkeministerip Mette Bockip oqaatigaa.

Powered by Labrador CMS