takornariaqarneq
Kirkegaard: Visit Greenland sipaarfiginngilarput
Visit Greenlandip sullissinermut isumaqatigiissutaanut Aningaasanut inatsisissatut siunnersuummi suli 13.911.000 koruunit immikkoortinneqarsimapput, Jens-Erik Kirkegaard erseqqissaavoq. Kontujuna alla pineqartoq.
Inuussutissarsiornermut aatsitassanullu Naalakkersuisup Jens-Erik Kirkegaardip ullumi tusagassiorfinnut nalunaarutikkut eqqunnginnerarpaa Visit Greenlandip ingerlatai imaluunniit takornariaqarnermik inuussutissarsiut sipaarniarfigineqarnerat.
Akerlianik oqarpoq takornariaqarnermut aningaasanik amerlanerusunik immikkoortitsisoqartoq, pissutigalugu umiarsuarnik takornariartaatinik takornarianut nunamut ikaarnissaq akikinnerulersinneqarmat, aningaasat tamakkua allamit tigunagit.
Tusagassiorfinnut nalunaarutikkut allappoq:
"Akitsuutinik annikillisitsinerup aningaasalersuutissat Visit Greenlandimut kiffartuunneqarnissamut isumaqatigiissutip, aamma 2015-imi 13,911 millioner koruuninik aningaasartaqartussap, ilanngaavigineqarneratigut nassaarineqanngillat. 1,6 mio. koruunit siusinnerusukkut tusagassiuutitigut oqaatigineqartut, aningaasanut siusinnerusukkut kusanartulianik aamma misigisassarsiortitsinermik inuussutissarsiornermik nittarsaassinermik immikkut suliniuteqarnermut immikkoortinneqarsimasunut tunngassuteqarput. Aningaasat taakkua siunissami angallannermut suliassaqarfimmi akitsuutinik appartitsinikkut, takornariartitsisarnermik inuussutissarsiornermut atugassarititaasunut sinaakkutissat nukittorsarneqarnissaannut atugassiissutigineqassapput."
Taamaasilluni 1,6 millioner koruunit, siusinnerusukkut Visit Greenlandip amigaatigisassamisut nalunaarutigisai, qanoq isigineqarnissaat isumaqatigiinngissutaasorujussuuvoq.
Sermitsiaq nr. 36-mi septembarip 5-anni saqqummersumi allaaserisami allassimavoq 1,6 millioner koruunit pineqartut takornariaqarnermut siunnersuisoqatigiinnut aningaasatigut tapiissutaasut, aningaasat atorneqarsimallutik assinik filminillu sananermut, Kalaallit Nunaat pillugu allaaserisanut, tusagassiortunik angalatitsinermut kiisalu nunat allamiut angalatitseqatigiiffiinik workshop-ertitsinermut.
Anders Stenbakken aviisimi erseqqissaavoq missingersuutit 10 procentiisa annaanerat takornariaqarnermik ingerlatsiviit maluginngitsoornavianngikkaat.
Tusagassiorfinnut nalunaarutikkut Jens-Erik Kirkegaardip sipaarut tamanna pinnagu taarsiullugu oqaluttuaraa aningaasat atorneqartut umiarsuarnik takornariartaatinik takornarianut akitsuutip peerneqarneranut, taamaattumillu takornariaqarneq aningaasaliiffigineqarsimasoq.
Taamaasilluni tusagassiorfinnut nalunaarummi allassimavoq, Naalakkersuisut ukiaanerata ingerlanerani takornariartitsisarnermut inuussutissarsiornermut iluaqutaasumik 10 millioner koruunit missaannut naapertuuttumik suliniuteqarnerup annertusinissaa pilersaarutigaat. Tamanna ilaatigut umiarsuarmik takornariartitsinermut akitsuutit 8,4 mio. koruuninik annikillisinneqarnissaannik siunnersuuteqarnikkut pissaaq. Tamatuma saniatigut takornarianik timmisartuussinermut (nunanut allanut aalajangersimasumik angallaviunngitsunut) iluaqutaasumik timmisartumik angallassinermut suliassaqarfimmi akitsuutinik allanik 1,3 mio. koruuninik oqilisaanissaq siunertaavoq.
– Aningaasartuuteqarfiusussanut siunnersuutinut taakkununnga siunertaavoq umiarsuarmik takornariartitsisartumik ilaasut, Kalaallit Nunaannukartartut amerlassusaasa ukiuni arlalinni ikiliartorsimasut mumisinneqarnissaat, peqatigisaanillu takornariartitsisarnermik inuussutissarsiortunut atugassarititaasunut sinaakkutissat pitsaanerulersinneqarnissaat, Jens-Erik Kirkegaard nassuiaavoq.
Kalaallilli Nunaata ussassaarutiginissaanut Visit Greenlandimik ajornartorsiortitsilernini eqqartunngilaa.
Tassami 1,6 millioner koruunit "kusanartulianik misigisassaqartitsinermullu" atorneqaraluartut aningaast Visit Greenlandip atorfissaqartippai.