aatsitassat

Kirkegaardip London Mining akissarsisikkaa

London Mining Greenland ukiup 'Prospector and Developer of the Year 2014'-iatut toqqarneqarpoq

London Miningip Kina-mi ingerlatsiviani pisortap Jenny Yangip akissarsiaq tiguaa. Inuussutissarsiornermut, Aatsitassaqarnermut SuliffeqarnermulluNaalakkersuisoqarfimmi pisortap Jørn Skov Nielsenip akissarsiaq tunniukkaa takuneqarsinnaavoq

Aatsitassarsioqatigiiffik London Mining Greenland A/S ingerlalluarpoq. Suliffeqarfiup Isukasiani saviminissarsiorfiliornissaa ukioq kingulleq isumaqatigiissutigineqarpoq.

Inuussutissarsiornermut aatsitassanullu naalakkersuisup Jens-Erik Kirkegaard nalunaarpoq London Mining Greenland 'Prospector and Developer of the Year 2014'-itut akissarsitinneqartoq.

Akissarsititsinermut ilaatigut tunngaviuvoq London Mining Greenland A/S-ip ulloq 24. oktober 2013 Isukasiani ingerlatseqatigiiffiup saviminissarsiorfissaanut ukiuni 30-ini atuuttussamik piiaanissamut akuersissummik pissarsinera. Akissarsiassamik tunniussinissamut tunngavissarititaapput, taassuma ingerlatseqatigiiffimmut imaluunniit inummut aatsitassanut suliassaqarfiup iluani sulilluarsimasumut, suliniuteqarluni takutitsisimasumut aammalu Kalaallit Nunaanni misissuinernik suliaqarnissamut suliffeqarfinnut allanut isumassarsiorfiusimasumut tunniunneqarnissaa. Piumasaqaatit allat tassaapput avatangiisinik isumalluarnartumik mianerinninneq aamma ingerlatseqatigiiffiup inuiaqatigiinni akisussaassuseqarnera.

Aatsitassarsioqatigiiffik nersualaarneqartoq
- London Mining-ip suleqatiginera nuannerluinnarpoq. Annertoorujussuarmik pikkorissuseqarput aammalu tamatigut aaqqiissutissarsinissaq siunnerfigalugu suliaqartarlutik, tamanna illuatungeriinnut tamanut isumalluarnarpoq, inuussutissarsiornermut aatsitassanullu naalakkersuisoq Jens-Erik Kirkegaard tusagassiutinut nalunaarummi oqarpoq.

Akissarsiassaq London Mining-ip Kina-mi ingerlataannut pisortamit Jenny Yang-imit tiguneqarpoq, taassumalu qujalluni oqalugiarnermini ilaatigut London Mining-ip aatsitassarsiorfiit suliassani inuiaqatigiinni piujuartussamik iluaqutaasumik sunniuteqartillugit aammalu kalaallit naleqartitaannut naapertuuteqqissaartumik ingerlanneqartarnissaannik anguniagaqarnera erseqqissarpaa. Jenny Yang aamma oqalugiarnermini ilisimatitsivoq, ingerlatseqatigiiffik suliassap ingerlaqqinnissaanut aningaasalersuinermut tunngaviusussat katiterneqarnissaannut eqeersimaartumik suliaqartoq.

PDAC nunarsuarmi aatsitassanut nuisitsisarfiit annersaraat, aammalu nunat ataasiakkaat aatsitassarsiornermut periarfissaqarfiunerinik nittarsaassisarnermut niuernikkullu isumaqatigiissuteqartarnernut qitiulluni. Nuisitsinermi sammisat ilaat tassaavoq nunani tamalaani aatsitassarsiorfinnut suliassaqarfinni, nunani tamalaani aningaasaqarnikkut ajornartoornerup malitsigisaanik, ingerlanerliulerneq.

- Taamaattumik nuannaajallannarpoq Kalaallit Nunaannit sumiiffiit ikittuinnaat ilaattut nutaarsiassat nuannersut arlallit saqqummiunneqarsinnaammata, ilanngullugu minnerunngutsumik London Mining-imut aamma True North Gems-imut piiaanissamut akuersissutit. Aamma Kalaallit Nunaanni aatsitassarsiorfinnut suliassaalertussat allat ingerlanneqarlualereersut annertuumik soqutigineqarput, soorlu Ironbark-ip zinkisiorfissamut suliassaa Tunup avannaarsuaniittoq, North American Nickel-ip Maniitsup eqqaani suliassaa aamma Greenland Minerals and Energy-p Kuannersuarni suliassaa allallu, Jens-Erik Kirkegaard oqarpoq.

Powered by Labrador CMS