Ammanerulersitsinissap unitsinneqarnera
Kirkegaard: Tele-Post ineriartorteqqinneqassaaq
Maanna Tele-Postip nalunaarasuartaateqarnikkut attaveqarneq pitsaanerusoq, akikinnerusoq sukkanerusorlu sammisinnaalerpai, Inatsisartunut ilaasortaq Jens-Erik Kirkegaard (S) ammanerulersitsinissap unitsinneqarnerata kingorna oqarpoq
Kalaallit Nunaanni nalunaarasuartaateqarnerup ammanerulersinneqarnerata inuiaqatigiit aningaasarsiornerannut kinguneqaatissaanik Nalunaarusiaq nalilerneqarpoq kukkuneqarlunilu amigaateqartoq. Taamaattumik inassutigineqarpoq ammanerulersitsinissamik aalajangernermut taanna tunngaviussanngitsoq, tusarniaanermi akissutituami, tunniussinissamut piffissap iluani nassiunneqarsimasumi, allassimavoq.
Siunissaq nalunartoq
Siumup politikkikkut oqaaseqartartua Jens-Erik Kirkegaard oqarpoq maanna ingerlaqqinnissaq pingaaruteqartoq.
– Ineriartornissaq, nalunaarasuartaateqarnikkut attaveqaatit nutaaliaasut akillu appasinnerusut anguniarlugit allamik aaqqiissuteqarnissaq inassutigaarput, Jens-Erik Kirkegaard oqarpoq, nangillunilu oqarluni inassuteqaat taanna Sanaartornermut Ataatsimiititaliami amerlanerussuteqartut malissimagaat.
– Nalunaarasuartaateqarnikkut tuniniaavik ukiuni arlalinni nalunartoqartinneqarsimavoq, mobilikkut attaveqaatit pillugit politikerit aalajangiisimannginnerat pissutigalugu. Ilisimaneqartutut internetti ammanerulersinneqarsimavoq, taamaattumik tassani ineriartorneq sukkaannerusimavoq, nalunaarasuartaateqarnerup siunissami qanoq aaqqissuunneqarnissaata ilisimaneqannginnera pissutigalugu, politikeri Siumumeersoq oqarpoq.
Siumut isigaluni ineriartortitsillunilu
Assersuutigalugu avannamut immap naqqatigut kabeli ukiuni pingasuni kinguaattoorsimavoq. Taanna 2014-imili tallineqarsimasinnaagunaraluarpoq, siusinnerusukkut aalajangiisoqarsimasuuppat, Jens-Erik Kirkegaard naliliivoq.
– Maanna aalajangiisoqareerpoq. Siumut ilisigissaagut nunallu nalunaarasuartaateqarnikkut atttaveqarnera suli sukkanerusumik ineriartortissallutigu, Jens-Erik Kirkegaard oqarpoq.
Oqaluttuaq tamaat Sermitsiami sapaatip akunnerani saqqummersumi atuaruk, taannalu ilinniagaqarneq pillugu immikkut ilassuteqarpoq 40-nik quppernilimmik. Aviisi aamma uani pisiarisinnaavat: