aatsitassat

Kirkegaard: Anguniakkavut allanngortinneqanngillat

Inuussutissarsiornermut aatsitassanullu Naalakkersuisup Jens-Erik Kirkegaardip erseqqissarpaa aatsitassarsiornermi pilersaarutit allanngortinneqanngitsut

Inuussutissarsiornermut Aatsitassanullu Naalakkersuisoq Jens-Erik Kirkegaard.

2018 nallertinnagu aatsitassanik piiaaffiit avataanilu uuliasiorluni qillerinissat qassiunissaannik Naalakkersuisut naatsorsuutigisaat allanngortinneqanngillat.
Taamatut oqarpoq inuussutissarsiornermut aatsitassanullu Naalakkersuisoq Jens-Erik Kirkegaard, Siumut, taassumalu ilaatigut maluginiarpaa professor Minik Rosingimik apersuineq aatsitassarsiornermi paasissutissanik kukkusunik tunngaveqarsimasoq.
– 2014-imiit 2018-imut Uuliamut Aatsitassanullu periusissami, tusarniaavigianeqartumi, Inatsisartunulu nassiunneqaqqammersumi takuneqarsinnaasutut aallaqqaataaniilli anguniakkat allanngortinneqanngillat. Tassani allassimavoq:
´.....piffissami 2014-2018-imut piiaaffiit 3-t ammarneqarsinnaassapput, nalilerneqarporlu ukioq allortarlugu avataani uuliasiorluni 1-2-riarluni qillerisoqartassasoq. Periusissatut suliniut ingerlanniakkanik tamakkuninnga qulakkeerinneqataavoq imaluunniit aallaaviuvoq, tamakkua 2018 nallertinnagu anguneqarumaartut´.
Akileraarutinut Atugarissaarnermullu Ataatsimiititaliarsuup isumaliutissiissutaa aallaavigalugu piffissamut sivisuumut Uuliamut Aatsitassanullu periutsimi takorloorneqarpoq:
´Naatsorsuineq ingerlanneqarsimavoq naatsorsueriaatsimi tunngavigalugu 2020-mi uuliaqarfimmi qilleriveeqqamik sanasoqalissasoq nappartanut 500 millioninut, 2025-imilu nappartanut 2 milliardinut qillerivissuarmik sanasoqalissasoq. Tunngavissaatillugu ataatsimut tapiissutit, aningaasaateqarfiup erniaasa il.il. iklisarnissaannut aningaasaateqarfimmit aningaasanik tigusisoqartassasoq, naatsorsuutigineqarpoq aningaasaateqarfik 2060-imi 435 milliarder koruunit sinnerlugit pisuussuteqalersimassasoq´.
Uuliamut Aatsitassanullu periusissaq pillugu aviisimi isumaliutersuummi ajoraluartumik kukkusumik issuaasoqarsimavoq piiaaffiit aammalu avataani uuliasiorluni suliniutissat qassiunissaannut tunngatillugu, Jens-Erik Kirkegaard allappoq:
– Kingorna paasissutissat eqqunngitsut KNR-mi naqqissimavakka - Naalakkersuisullu uuliamut aatsitassanullu naatsorsuutigisaat eqqortut paasissutissiissutigalugit.
Sermisiaq sap. ak. 7-imi professor Minik Rosingimik apersuilluni allaaserisaqarpoq ´Aatsitssanit killormut saatitaaneq´, tassanilu aallaaviupput paasissutissat eqqunngitsut.
Taamaattumik Naalakkersuisut uuliasiornermut aatsitassarsiornermullu suliassaqarfimmi naatsorsuutigisaat eqqortut aammaloorlunga erseqqissaqqerusuppaat, takuuk matuma siulianiittut, Inuussutissarsiornermut Aatsitassanullu Naalakkersuisoq Jens-Erik Kirkegaard nassuiaavoq.

Powered by Labrador CMS