atornerluinerit
Kingusissukkut kingunerlutsitsisut: Katsorsaallutik Angalaqatigiit ulapeqaat
Inersimasunik, meeraallutik kinguaassiuutitigut atornerlunneqarsimallutik kingunerlutsitsisimasunik Katsorsaallutik Angalaqatigiit, atorfissaqartinneqaqaat
Atorfissaqartinneqaqaat.
Katsorsaallutik Angalaqatigiit, Naalakkersuisut 2013-imi apriilimi pilersitaat, taama nalilerneqarput.
2013-imi Angalaqtigiit suliartik aallartikkamikkulli illoqarfiit Uummannaq, Aasiaat, Paamiut, Maniitsoq, Sisimiut Qaqortorlu angalaffigisimavaat.
Angalaqatigiit maanna Qaqortumiipput, taqqanilu tamakkuninnga sullissisunik aallarnisaataasumik ataatsimeeqateqartoqariarluni innuttaasunik ataatsimiititsisoqarpoq, inunnillu saaffiginnissimasunik oqaloqatiginnittoqarluni.
Amerlasuut kingaassiuutitigut atornerlunneqarsimapput
Angalaqatigiit aallartimmatali inuit 245-t saaffiginnissimapput. Manna tikillugu inersimasut, meeraanerminni kinguaassiuutitigut atornerlunneqarnerminnit kinguneqarnerlutsitsisimasut Angalaqatigiinnit, tarnip pissusianik ilisimasalinnit, katsorsarneqartarsimapput, isumaginninnermut, ilaqutariissutsimut naligiissitaanermullu Naalakkersuisoq Martha Lund Olsen, Siumut, paasissutissiivoq.
– Kalaallit Nunaanni inersimasorpassuit meeraanerminni kinguaassiuutitigut atornerlunneqarsimapput, tamannalu amerlaqisutigut inersimasunngoreernermi inuttut qaratsakkullu artorsaatinik pilersitsisarsimavoq. Angalaqatigiit tamakkua qaangerniarnissaannik ikiuissapput ataasiakkaallu inuunerminnik ingerlatsiseqqinniassallugit, ikinngutit ilaqutariillu akornanni aammalu suliffimmi inooqataasutut ingerlalerniassammata, Martha Lund Olsen nassuiaavoq.