siulittaasunngorniuunneq
Kingulleq: Kim Kielsen Siumumi siulittaasunngorpoq
Taasisunit 65-init Kim Kielsen 44-nik taaneqarpoq
Ullumikkut arfininngornermi Siumup Nuummi immikkut ittumik ataatsimeersuarluni siulittaasussarsiornerani Kim Kielsen ajugaangaatsiarpoq.
Kim Kielsen taasisunit 65-init 44-nik taaneqarpoq.
Taasisinnaasut katillugit 66-iupput.
Doris Jakobsen marlunnik taaneqarpoq, Nick Nielsen marlunnik taaneqarluni Lars-Emil Johansneilu 17-inik taaneqarluni.
Taasinerup kingorna Kim Kielsen killitsissimasorujussuuvoq. Immikkut ittumik ataatsimeersuaqataasunit qanoq tapersersortigineqartiginini takugamiuk qullilivoq. Taasisinnaasut, immikkut ittumik ataatsimeersuarnermut anngussinnaasimanngisut, sms-ikkut taasipput.
– Siumumi siulittaasunngussallunga takorloorsimanngisaannarpara. Siulittaasumut qinigaanera ataqqinaataasorujussuartut isigaara. Suliassaaq maniguullunga tigussavara, neriuppungalu ullumikkut uannik tatiginninnermik takutitsinersi naammassisinnaassallugu. Innuttaasut sullisissavakka, Kim Kielsen qujassuteqarluni naatsumik oqalugiarnermini sikilluni qujassuteqangaarluni oqarpoq.