kinguaassiuutitigut nappaatit
Kinguaassiuutitigut nappaatillit amerlalluinnartut
Gonoré syfilisilu Danmarkimi atuuttunit quleriaammik amerlanerupput, klamydialu suli qaffasinnerulluni.Tamatuma peqatigisaanik erninerit naartuersinnernit ikinnerupput. Immikkut ittumik pisoqartariaqalerpoq,pineqartumut naalakkersuisoq oqarpoq
Isumannaatsumik atoqatigiittoqartarnissaanik paasisitsiniaanerit oqaaqqissaarinerillu ukiuni kingullerni arlalissuarni amigaataasimanngivipput
Kisianni tamanna iluaqutaanngilaq. Innuttaasut kinguaassiuutitigut nappaateqarlutik peqqinnissaqarfimmut saaffiginnittartut suli amerlasorujussuupput ikiliartornerannullu takussutissaqarani. Naartuersinnerit eqqarsaatigalugit pissutsit aamma taamaapput.
Siorna gonorértut taamaalillutik 1.323-upput, 14-it 30-llu ukiullit akornanni amerlanerpaajullutik. Kisitsit ukiuni kingullerni arlalinni taamaaginnangajassimavoq. Taamaappoq aamma klamydia eqqarsaatigalugu, 2016-imi klamydiartut 3.051-iusimallutik, kingumullu 14-iniit 20-t sinningaatsiarlugit ukiullit amerlanerpaajullutik
Nappaat inuunermut navianaatilik syfilis, ukiorpanni nungutipajaavinneqarsimagaluartoq, 2010-miilli atuukkiartuaaqqilersimavoq, tamatumanilu 2015-ip aamma 2016-ip akornanni syfilisertut 71-it nassaarineqarfigisaanni syfilisertut 30 procentimik amerleriarsimallutik.
Naartuersinnerit aamma suli qaffasipput. Siorna meeqqat inunngortut 835-nik amerlassuseqartut naartuersinnerit 855-it pisimapput – taakkunannga 24-t sapaatip-akunnerata 12-issaata kingorna pisimallutik, tassa kingusissukkut naartuersinnernik taaneqartartuullutik. Nunatta nakorsaanerisaa allaat isumaqalersimavoq naartuersittarnerit naartunaveersaatitut atorneqartut.
Allaaserisaq AG aviisimi tamakkerlugu atuarsinnaavat, aviisi uani pisiarisinnaavat: