Kinguaassiuutitigut atornerluisarnerit pisarunnaassapput

Kinguaassiuutitigut atornerluisarneq pillugu akiuinissamut Namminersorlutik Oqartussanit suliniutissaq maanna saqqummiunneqaleruttorpoq. Anguniakkat annertuut tassani saqqummiunneqarput.

Ajornartorsiut millisinneqarnissaa anguniaannarneqanngilaq, tassami meeqqanut atornerluinerit pinngilluinnarnissaat anguniarneqarpoq 2022-mi inuusut tamarmik kinguaassiuutitigut atornerlunneqanngilluinnarnissaat anguniarneqarluni.

Aamma 15-it 29-nut ukiullit atornerlunneqanngilluinnarnissaat anguniarneqarpoq.

Kinguaassiuutitigut atornerlunneqarsimasut suliniummut peqataatinneqarput.

- Pisoq oqaluuserinngisaannarnikuuara, isumaqartarsimagamami kikkulluunniit taama misigisaqarsimaannartut, arnaq atornerlunneqarsimasoq oqarpoq.

Suliniutitassigiinngitsut

Atornerlunneqarsimasunut ikiorsiisoqartalereerpoq, tassani angalallutik ikiusartunik pilersitsisoqarnikuulluni. Ajoraluartumilli eqqugaasut tamarmik ikiorserneqarneq ajorput. Meeqqammi amerlasuut kinguaassiuutitigut atornerlunneqarsimasut amerlasuut suli ikiorserneqarsimanngillat. Atornerlunneqarsimasut tamarmik ikiortariaqartut ikiorserneqarnissaat anguniarneqarpoq.

- Ikiorserneqareernerma kingorna pilluaqqilerlunga misigaara. Imminut ilisarisinnaanngoqqippunga. Suli imminut suliassaqaraluaqalunga anguniakkama annersaa angoreerlugu misigaanga. Inuunermut pitsaanerusumut atugaqalernissara takusinnaalerpara, arnaq meeraalluni kinguaassiuutitigut atornerlunneqarsimasoq oqarpoq.

Eqqugaasut tamarmik ikiorserneqarnissaat Naalakkersuisunit anguniarneqarpoq. Tassani atornerlunneqarsimasut kiisalu atornerlunneqarnissamut eqqugaasinnaasut ikiorserneqartalissapput. Kinguaassiuutitigut atornerluisimasut kiisalu atornerluinissamut eqqarsaateqartut aamma ikiorserneqartalissapput. Suleqataasinnaasut tamaasa ikiortigalugit tamarmik ikiorserneqartalernissaat sulissutaassaaq.

Eqqugaasinnaasut

Kinguaassiuutitigut atornerluisoqannginnissaanik pinaveersaartitsisoqarnissaa suliassanut annertuunut ilaavoq. Meeqqat qaqagukkut kinguaassiuutitigut atornerlunneqarnissamut navianartorsiulertarfiat paasiniarneqassaaq.

- Meeqqat inuunerat ataatsimut isigineqartariaqarpoq, tassani inuunerminni naapitaat misissorneqassapput, qaqagulu navianartoqalersinnaanera misissorneqassalluni. Assersuutigalugu meeqqat atuareernermi kingorna kisimiillutik angerlarsimasartut amerlapput, taamaasinerani kinguaassiuutitigut kanngutsaatsuliornerit pisinnaasarput. Atuareernermi sammisassaqartitsiveqarneq iluaqutaasoq nunanit allanit takussutissaavoq, suliniummi ilaatigut allaqqasoqarpoq.

Atornerluisoqanngilluinnarnissaa

Qaqagukkut kanngutsaatsuliortoqartarnersoq inoqarfinni aamma killigitinneqartoq assigiinneq ajorput.

- Inoqarfiit ilaanni kanngutsaatsuliornerit ulluinnarni pisarput, tassani allannguisoqarnissaa pingaaruteqarpoq, suliniummi ilaatigut allaqqasoqarpoq.

Suliniutit arfinillit pingaartinneqartut:

Paasittutissat kiisalu avitseqatigiinneq
Pinaveersaartitsineq
Immikkoortortaqarfiit akimorlugit suleqatigiinneq
Eqqugaasut qanigisaallu
Inoqarfiit
Kinguaassiuutitigut atornerluisarnermut pissusilersuutit