Kinguaassiutitigut pinerluutinik suliat qaleriiaartut

Politimestereqarfimmit ukiumoortumik Avannaani politeeqarfinnut tikeraarluni angalasoqarnerani paasinarsivoq, kinguaassiutitigut pinerluutit politiit suliariniaraangamikkit arlalitsigut sivisuallaartartut.

Tamanna TV2-p aallakaatitassiaani Station 2-mi takuneqarsinnaavoq.

Nunatsinni angalaarneq
Aallakaatitassiani pingasuni politiit Kalaallit Nunaanni sulinerat malinnaavigineqarpoq.TV-liortartullu illoqarfiit Nuuk, Aasiaat, Ilulissat, Qasigiannguit, Uummannaq aamma Upernavik aallakaatitassiariniarlugit tikippaat.

Suliat ilaatigut atornerluinermut aamma meeqqanik kinguaassiutitigut innarliinernut tunngapput.

- Maani Kalaallit Nunaanni suliat piffissami sivisuumik ingerlanneqarneranut peqqutaasinnaasut amerlapput. Taamaattorli kinguaassiutitigut pinerluutinik suliat sukkanerusumik eqqartuussivimmut apuunneqartarnissaanut pitsaanerunissarput allanngortissanngilaa, Nunatsinni Politini unnerluussisuuneq Liselotte Bøhm Station 2-mut oqarpoq.

Killisiorneqartassapput
Suliami pineqartut killisiorneqarnissaannut sila, pinngortitaq aamma isorartussuserujussuit nunaqarfiit tikinneqarnissaannut ajornakusoortitsisartut tikkuarpaa.

- Apuunnissarlu iluatsippat, inuk pineqartoq tikittamiinngitsoq naammattoorneqarajuttarpoq, politiillu suliaminnik suallagatik utertariaqartartut, taanna nassuiaavoq.

Taamatullu tullissaani pisoqaqqippat, piffissaq ingerlalertupallattarpoq. Saniatigullu sulianik suliarineqartussanik nutaanik takkussuuttoqarusaaginnavittarpoq. Tamannali suliap arriinneranut utoqqatsissutaassanngilaq.

Suliat naammassineqanngitsut arlallit
- Ukioq manna angalanermi kinguaassiutitigut pinerlunnerit immikkut isiginiarneqarput, tassanilu sulianik sivisuallaartumik naammassineqanngitsunik assersuutissanik arlalinnik takussutissaqarpoq. Naak nunatsinni pissutit atuuttulluunniit assersuutigissagaluaraanni. Tassani pitsaanerulertariaqavissorpugut, Liselotte Bøhm oqarpoq.

Aallakaatitassiami ilaatigut Qasigiannguani suliamik ingerlatsineq tamaviaanngitsoq assersuutitut takuneqarsinnaavoq. Politeeqarfiuvoq ataasiinnarmik sulisoqartoq.

Suliamik ingerlatsinermi ataqatigiittoqanngilaq, unnerluussinerit aamma nalunaarsuiffiit pappiliaannarnut allattorneqarmata. Politeeq nutaaq suliassarpassuarni iluarsaassileruttorpoq.

Aamma atuaruk: Politiit imminut toquttarneq pillugu annerusumik iliuuseqartoqarnissaa ujartorpaat