innarliineq
Kinguaassiutitigut innarlerneqarsimasunut ikiuutit
Isumaginninnermut Naalakkersuisup kinguaassiutitigut innarliisarnerit annertuumik iliuuseqarfigerusuppai
Meeqqat kinguaassiutigimigut innarlerneqartartut amerlavallaarujussuarput.
Isumaginninnermut Naalakkersuisoq, Sara Olsvig (IA), ullumi tusagassiortunik katersortitsinermi naqissusiivoq.
Neqeroorutit
Tamanna pissutigalugu taanna sukkanerpaamik kinguaassiutitigut atornerluisarnermut tamanut atuuttussamik neqeroorusiorniarpoq.
- Atornerlunnneqarsimasuugaanni, innarliisuugaanni, meeraagaanni, inersimasuugaanni, qanigisaasuugaanni katsorsaasuugaanniluunniit, pitsaanerpaamik ikiorsiissuteqartariaqarpoq, Sara Olsvig (IA) tusagassiortunik katersortitsinermi oqarpoq.
Innarliinermut neqeroorutissaq suliarineqaqqaartariaqarmat, suliniutit suli tamakkiisumik inissinneqarsimanngillat. Taamaattoq Sara Olsvigip (IA) suliniutit ersarissuullutilli eqimattakkuutaanut tulluuttuussasut oqaatigaa.
Suliniutigineqartut najukkami pissutsinut tulluarsarneqassasut taamatulli najukkami inuiaqatigiit akuliutsinneqassasut taassuma oqaatigaattaaq.
Kingunerlutitsinermi ikiuutit
Suliniutit ilagaat ukiualunni iluatsittumik ingerlanneqartoq, Angalaqatigiittartut inuit kinguaassiutimigut innarligaanikut kingunerluutaannik ikiorsiisartut. Innarligaasimalluni kingunerlutsitsinerup suliarinissaannik periarfissinneqarnerup saniatigut kinguaariit tulliisa innarlerneqarnissaraluat akiorneqartarpoq.
- Taamatut ikiorserneqarnissaq annertusoq paasinarsisimavoq, Sara Olsvig (IA) oqarpoq.
Innarliisunut katsorsaat
Nutaatulli taaneqarsinnaavoq innarliisartut immikkut sammisaralugit katsorsarneqarnissaannik neqerooruteqarnissaq.
- Kinguaassiutitigut innarliisartut katsorsarneqarnerisigut innarliinissaraluit malunnaatilimmik annikillisissinnaavaat, pinaveersaartitsinermillu suliniutaassalluni pingaarutilik, Sara Olsvig (IA) oqarpoq
Isiginnittariaaseq
Naalakkersuisunilli iliuusissatut pilersaarutit akuerisimasaat naammanngillat. Ajornartorsiut tamakkiisumik akiorneqassapput inuiaqatigiit amerlanersaat oqalliseqataanissaat pisariaqarpoq.
- Meeqqanut isiginnittariaaserput oqallisigisariaqarparput. Taamatulli arnanut isiginnittariaaserput oqallisigisariaqarlugu. Inuit tamarmik nammineq timertik oqartussaaffigingaat naqissusertariaqarparput, Sara Olsvig (IA) naqissusiivoq.