Iginniarfik
Kinguaassiutitigut atornerluisoq pinaveersaartitsinermik ujartuisoq
Angut Iginniarfimmiu 40-nik ukiulik siorna nunaqarfimmi inunnut qinngasaartittartunut nikassarneqartartunullu iliuuseqartoqarnissaanik ujartuivoq. Taamanikkut aamma nammineerluni pinaveersaartitsinermik suliaqarniarluni pilersaaruteqarpoq
40-nik ukiulik Iginniarfimmiu, qanittumi pinerluuteqarsimasunut inissiisarfimmi Herstedvesterimi killeqanngitsumik inissinneqartussanngorlugu, Aasianni Qaasuitsup Eqqartuussivianit eqqartuunneqartoq, siorna aviisi Tamanut Avannaani aqqutigalugu Iginniarfimmi pinaveersaartitsinerup pitsaanerunissaanik ujartuivoq.
Taanna taamanikkut oqarpoq, inuit qinngasaartittartut nikassarneqartartullu nunaqarfimmi sullinneqarnerat amigarpallaartoq pitsaanerusumillu sullinneqartariaqartut, minnerunngitsumillu taamanikkut nammineerluni pitsaaliuinermik suliaqarnissaminik pilersaaruteqarluni oqaatigaa, soorluttaaq ilinniakkat pikkorissarsimanerillu arlallit piginerarlugit, tamannali allagartanik takussutissaqartinnagu.
Qaasuitsup Eqqartuussiviani eqqartuussisut tamarmiusut isumaqatigiillutik unnerluussutaasut amerlanerit eqqortuutippaat, ilaatigut pinngitsaaliinerit, kinguaassiuutitigut kannguttaatsuliornerit, peqquserlunnerit, pinngitsaaleeriarnerit, kinguaassiuutitigullu kanngutsaatsulioriaraluarnerit eqqartuussissutigineqarput. Tamanna Sermitsiaq.AG-mi decemberip qulingiluaanni allaaserineqartareerpoq.
Politimestereqarfimmi unnerluussisoq ,Tanja Søderlund oqarpoq, angutip pineqartup unnerluussissutit 14-it pineqaatissinneqaatigigai, pinerlunnerillu 2007-miit 2014 tikillugu pisarsimapput.
Allaaserineqartoq aviisimi Tamanut Avannaanimi atuarneqarsinnaavoq. Qaasuitsup Kommuniani pisartunik allanik aamma aviisimi atuarsinnaavutit, aviisi akeqanngitsumik ataani aaneqarsinnaavoq: