atornerluinerit
- Kinguaassiutitigut atornerluisarnerit unitsinneqarnissaat sapinngisara tamaat unitsinniassavakka
Kinguaassiutitigut atornerlugaasimasoq, Henrik Thomsen, Nakuusap suliniutaani peqataavoq. Ajornartorsiutip oqallisigineqarnerulernissaa anguniarpaa
Henrik Thomsen Nakuusap suliniutaanut peqataarusunnerluni aperineqarami, sivisuumik eqqarsaatiginngilaa.
- Peqataanissara ingerlaannaq aalajangiuppara, Sermitsiaq.AG-mut oqarpoq.
Allanit misigineqassanngilaq
Kinguaassiutitigut atornerlugaasimanini pillugu Facebookikkut sassarpoq ukiut marluk matuma siorna.
- Ajornartorsiutip anigorneqarnissaa anguniarlugu iliuuseqarusuppunga, Henrik Thomsen oqarpoq.
Anniaatigisarsimasani ilaatigut saqqummiuppai. Imminut toqunnissani ilaatigut eqqarsaatigilersimagaluarlugu.
- Pereersut allanngortinneqarsinnaanngillat. Meeqqat allat misiginikuusakka misigissanngikkaat suleqataaffigisinnaavara.
Sapiissuseqalersitseqataarusuppoq
Naak misiginikuusani oqaluttuarereeraluarlugit suliniummi peqataavoq.
- Taamatut sassarniarneq ajornartorujussuuvoq. Kinguaassiutitigut atornerlugaasimanera pillugu sassarama kanngusoqaanga - sassartussanngoramalu pissangaqaanga.
- Kisianni kanngusuutissaqannginnera paasivara. Sassareernermami kingorna kaammattorluarneqarpunga.
Kinguaassiutitigut atornerlugaasimasut neriuuteqalersimanissaat sapiissuseqalersimanissaallu Henrik Thomsenip sassareernermi kingorna neriuutigaa. Atornerlugaasimanerup oqaluuserineqarnissaa politiinullu tunniussisinnaaneq sapiissuseqarfigineqalersimassasoq neriuutigaa.
- Kinguaassiutitigut atornerlugaasimasut amerlasuut sassareernerma kingorna uannut attaveqarput, aatsaat pisimasoq oqaatigalugu oqarlutik. Qanoq iliussanerlutik apeqquteqarput. Qanoq iliuuseqarsimanera oqaluttuarisarpara.
Nakuusap suliniutaa neriuuteqarfigilluarpaa.
- Pissangalaarpunga, kisianni aamma imminut tulluusimaarutigaanga. Ajornartorsiortunut ikiuisinnaanera nuannaarutigaara, oqarpoq.
Nakuusap kinguaassiutitigut atornerluisarneq pillugu suliniutaa saqqummersinneqarpoq ullumi. Tassani filmiaqqat arfinillit ilaatigut saqqummersinneqarput.