atornerluinerit

- Kinguaassiutitigut atornerluisarneq oqaluuserineqarnerusariaqarpoq

Nakuusap kinguaassiutitigut atornerluisarneq pillugu suliniutaa saqqummersinneqarpoq ullumi

Siorna 2017-imi martsip qaammataagaa Nakuusa meeqqanut kinguaassiutitigut atornerluisarneq pillugu aningaasanik katersuiniartitsivoq, tassani 1,65 miilion koruunit katersorneqarput. Ullumikkullu suliaq 'Ullut Tamaasa'-mik qulequtsigaq saqqummersippaa, neriuutigalugu inuiaqatigiit kinguaassiutitigut atornerluinermi akiueqataanissamut sakkussaannik tamaasa tuniumaarlugit.

Innuttaasut peqataanissaat kaammaatuutigineqaqqippoq.

- Ajoraluartumik ajornartorsiut siammasingaarmat oqartussat namminerisaminnillu suliniuteqartut kisimiillutik suliaq naammassisinnaanngilaat. Taamaattumillu inuiaqatigiit tamarmik kinguaassiutitigut atornerluisarnermut akiuiniarnermi qanoq iliuuseqaqataasinnaanertik nalornissutigiunnaassavaat, Nakuusami suliamik aqutsisoq, Najaaraq Møller, oqarpoq.

Ammanerulernissaq anguniarneqarpoq
Sapaatit akunneri tulliuttuni inuiaqatigiit paasissutissaliaq takusaqattaalertussaavaat, tassanngaanniillu sapiissuseqarnerulernissaat, paasisaqarnerunissaat sakkussaqalernissaallu neriuutiginarpoq, taamaalillutik akisussaassusertik ilisimaaralugu ajornartorsiummut iliuuseqaqataasinnaalerniassammata. Suliniut filminik arfinilinnik imaqarpoq.

- Kinguaassiutitigut atornerluisarneq oqaluuserineqarnerulernissaa anguniarneqarpoq. Filmiaqqat aqqutigalugit ajornartorsiut oqaluuserineqalernissaa kissaatigaarput, Najaaraq Møller nassuiaavoq.

Kinguaassiutitigut atornerlugaasimasunut suliaqartut suleqatigineqarput. Inuup pissusaanik suliaqartut, ilinniartitsisut, inunnik sullissisut, politiit, peqqissaasut MIO-lu suleqatigineqarput. Kinguaassiutitigut atornerlugaasut aamma suliniummi ilaapput. Meeqqat inuusuttullu aamma atuarfinni workshoppertitsillutik.

Nalunaarutiginnittarnissaq
Kinguaassiutitigut atornerluisarnerup ajornartorsiutaanerujussua suliniummi saqqummersinniarneqarpoq. Maani nunami meeqqat pingasuugaangata ataaseq kinguaassiutimigut atornerlugaasimasarpoq, Najaaraq Møller oqarpoq.

- Ajornartorsiutip annikillinissaa innuttaassunit suleqataaffigineqartariaqarpoq. Arlaannik pasinartoqarpat kommunimut nalunaaruteqartoqartariaqarpoq.

Suliniut taamaasilluni innuttaasunut kisimi saaffiginnittuussanngilaq, kommunilli aamma nalunaarutiginnittoqarneranut piareersimasassapput.

- Nalunaarutigineqartut kommuninit suliarineqaqqittannginneri suli takussaavoq, tamanna allanngortittariaqarpoq.

Oqartussat suleqatiginerlunneqartut meeqqat illersuisuat Aviâja Egede Lynge isornartorsiuivoq sapaatip akunnerata siuliani.

Paasititsiniut TV-kkut radiokkullu sapaatip akunnerini arfinilinni ingerlaartinneqassaaq. Radio TV-llu saniatigut suliniut plakatinik, mappersakkanik, inunngorlaanut angajoqqaanngortunullu nunarsuarmut tikilluaqqusinermi poortukkanik, saqqarmiunik tunisassianik inuusuttuaqqanullu tarnikkut timikkullu killinik sammisunik atuakkamik malitseqarumaarpoq. Nakuusap ajornartorsiut pillugu suliniuteqarnini siunissami ingerlatiinnarallassavaa.

- Kikkut tamarmik peqataappata ajornartorsiut millisarneqarsinnaasoq, pitsaanerulernissamullu neriuuteqartoq ersersinniarneqarpoq, Najaaraq Møller oqarpoq.

Powered by Labrador CMS