Kinguaassiutitigut atornerluineq: Ikiorsiissutit saqqummiunneqalerput
Kinguaassiutitigut atornerluisarnermut suliniutit annertuut saqqummiunneqalerput
Kinguaassiutitigut innarlerneqarsimasunut ikiorsiissutit ullumi Naalakkersuisunit saqqummiutissavaat.
Ikiorsiissuteqarnikkut anguniarneqarpoq ajornartorsiutip annertoqisup annikillisarneqarnissaa.
- Atornerlunnneqarsimasuugaanni, innarliisuugaanni, meeraagaanni, inersimasuugaanni, qanigisaasuugaanni katsorsaasuugaanniluunniit, pitsaanerpaamik ikiorsiissuteqartariaqarpoq, Isumaginninnermut Naalakkersuisuusimasoq Sara Olsvig (IA) ukioq kingulleq junip qaammataani ikiorsiissutit saqqummiunnerini oqarpoq.
Upernaaq Naalakkersuisut siulittaasuat Kim Kielsen (S) qinersisoqarnissaanik suaarutiginnimmat ikiorsiissutit naammasseqqajaasimapput. Tamatuma kingunerisaanik kinguaassiutitigut atornerlunneqarsimasunut suliniutit qaammatialunni kinguaattooruteqarput.
Massakkulli ikiorsiissutit Naalakkersuisumit nutaamit Anthon Frederiksenimit (PN) naammassineqarput. Ikiorsiissutit sunik imaqarnersut ualeru nalunaaqutaq 16:30 oqaatigineqassapput.