pinngitsaaliisarnerit
Kinguaassiutitigut atornerluineq pillugu saqqummersitsinissaq atuarfiit soqutiginngilaat
Eqqumiitsulianik saqqummersitsinermi 'Revner i Sjælenimi' kinguaassiutitigut atornerluisarnerit pillugit atuartitsinermut atortut suliarilluakkat ilaapput. Kisianni sinerissami atuarfiit soqutiginninnerat annertunngilaq.
Sammisap oqimaatsup qaqinnissaanut periarfissatsialaavoq. Eqqumiitsuliortoq Gukki Nuka saqqummersitani 'Revner i Sjælen' pillugu taama oqarpoq.
Tassami kinguaassiutitigut atornerluisarnerit pillugit atuartitsissutit suilarilluakkat saqqummersitsinermut ilaapput. Taamaammat atuarfiit sammisaq oqallisiginissaanut periarfissaq tigusariaqaraat Gukki Nuka isumaqarpoq.
- Pineqarnermami assinganik meeqqat allat taama pineqannginnissaannut tunngavoq, Gukki Nuka Sermitsiaq.AG-mut oqarpoq.
Atuarfiit tunuarsimaarput
Saqqummersitaq maanna Kalaallit Nunaanni angalaarunneqarpoq, kisianni atuarfinniit ilinniartoqarfinniillu soqutiginninneq annertunngilaq, naak saqqummersitsineq pillugu atortut toqqaannartumik nassiunneqarsimagaluartut.
Ilulissani saqqummersitsineq taamaallaat Aasianni GUX-imeersunit alakkarneqarpoq. Sisimiunilu Gukki Nukap atuarfinnit soqutiginnittunik tusagaqarsimanngilaq.
- Uanga saqqummersitara pivallaanngilara, kisianni atuartitsissutit atorneqannginnerat pakatsinarpoq, Gukki Nuka oqarpoq.
Atuaruk: Ullumikkut imminut qissatigineq ajorpunga, meeqqaalli pillugit qiasarpunga
- Atuarfiit periarfissaq tigullugu inuusuttunut sammitinngimmassuk uggoraara. Pinngitsaaliisarnerit pinngitsoortinnissaanut pinaveersaartitseqataasinnaallutillu aamma ilaat pinngitsaalineqarsimasinnaasut ikiorneqarnissaminnik ujartuilersinnaapput.
Oqallisiginnikkusunnginnerat ernummatigigaa
Saqqummersitat ukiaq Nuummi takutinneqarmata allaalluinnarpoq. Tassani meeqqat atuarfianni atuartut angajulliit illoqarfimmilu ilinniartoqarfiit allat saqqummersitsinermut alajjarterilluarput, atuartitsissutillu aamma atorluarneqarlutik.
- Nunap ilaani sammisaq aalajangersimasunngoraangat inummullu ataatsimut tunngaleraangat suli oqallisigiumaneqannginnersoq naluara, Gukki Nuka oqarpoq.
Ilinniartitsissut atuartitsissutissat minnerpaamik qanoq atorneqarsinnaanersut misissulaassagaat taassuma kajumissaarutigaa.
Atuartitsissutit Nuummi Eqqumiitsulianik Saqqummersitsiviup nittartagaani aaneqarsinnaapput.
- Suna pingaarnerua? Aaqqiissummik tukattumik tigusinata qularnartumik inissisimanissaq taamaalilluni pinngitsoorlugu, imaluunniit pinngitsaaliineq ammasumik sulianik amerlasuunik saqqummersitsinissaq apeqqutaatinnagu, meeqqat inuusuttullu taamaalillutik amerlanerujussuit oqaluttuarneq iluaqutaasoq misigitinnissaat? Gukki Nuka aperaaq.
Saqqummersitsineq apriilip 16-ata tungaanut Sisimiuni Taseralimmi alakkarneqarsinnaavoq. Kingorna nunap sinnerani angalaarunneqassaaq.