Kina

Kinap Issittumi pissaanilissuanngornissaa pinngitsoorneqarsinnaanngitsoq

Issittumi periusissiap saqqummiunneqartup Kina ajukkutigani anguniagartooq takutippaa

Den kinesiske isbryder 'Snedragen' på ekspedition i Arktis i 2016

Qaammatip siuliani Kinap Issittoq pillugu periusissiani White Paperimik taagorneqartoq saqqummiuppaa. Naak annertuumik tupaallannartunik imaqanngikkaluartoq, Kinap Issittumi politikkiani nikinnermik malunnartitsivoq, tassanilu nunap immikkoortuani aamma pissaanilissuartut piumasaqaatilittut inissippoq.

- Kina siornatigut Issittoq pillugu nalunaruteqartarnermini tunuarsimaarnerusaraluarpoq. Maannalu pissaanilissuartut anguniagaqarlutik oqariartuutigaat, Camilla T.N. Sørensen, Forsvarsakademietimeersoq Sermitsiaq.AG-mut oqarpoq.

Professor Anne-Mary Brady, Canterbury Universitymi New Zealandimeersoq naliliinermut tamatumunnga isumaqataavoq.

- Issittumi naalagaaffiit suleqatiginerinut imminut tatiginerusumik pissusilersorneq White Paperip malunnartippaa, tassani nuna Issittumi 'Issittup qanittup' soqutiginnivinneranut, Kinap naqissuserpaa, taanna Sermitsiaq.AG-mut oqarpoq.

Pissaanilissuartut akisussaaffik tigugaa
Kinap ukiorpassuit ingerlanerini issittumi attaveqaatini attavigilluartarpai. Tamannalu aamma periusissiap matuma nalunaarutigineqannginnerani pivoq. Allakkamilu Issittoq eqqissisimasoq aamma silap pissusia avatangiisillu pillugit suleqatigiinneq oqaluuserineqarput.

- Allakkami anguniakkat amerlanersaat issittumi naalagaaffinnut tigujuminartu, Kina nunanut allanut attaveqarnermigut qulakkeerinnippoq, Anne-Mary Brady oqarpoq.

Nunat tamalaat akerleriinnerannut aamma unammilligassaqarnerannut tunngatillugu, Kina maanna ammanerusumik pissaanilissuartut akisussaaffimmik tigusinerusoq, Camilla T.N. Sørensen misissuinermini allappoq.

- Nunap aningaasaqarnikkut nukittussusaata annerulernerani, aamma pissaanilissuartut soqutigisaminik nallersuilluarnissani pinngitsoorsinnaanngilaa, taanna allappoq.

Iluanaarutit pissarsiarisinnaagaat
Tassanilu Kinap Issittoq soqutigisaralugu ammasumik naqissusiivoq. Tamannalu tunuliaqutigalugu, danskit naalakkersuisui aamma Naalakkersuisut qaninnerusumik suleqatigiinnerulernissaat, Camilla T.N. Sørensen kajumissaaruteqarpoq. Taamaallaammi taamaaliornikkut kinamiut Issittumi aningaasaleerusussuseqarnerannit iluanaarutit pissarsiarineqarsinnaammata, saniatigullu atanerulernissamut mianersuussassat malitsigineqartussat maluginiarlugit.

- Kinamiut Issittumi annerusumik inissisimaleriartornerat Danmarkip imaluunniit Kalaallit Nunaata aqussinnaanngilaa, taanna naqissusiivoq.

Powered by Labrador CMS