Ajunaarnersuup kingorna
Kinamiut suliartortut Qasigianngualiaanneqarallarput
Royal Greenlandip Kinaminngaanniit sulisortaavi sapaatiummat Kangerlussuarmut tikipput, taakku Royal Greenlandip Uummannami tunitsiviani sulissaangaluarput. Uummannallu eqqaani pisut pissutigalugit taakku Qasigiannguanukaanneqarallarput.
Kinamiut qulingiluat Royal Greenlandip sulisui Uummannami sulisussaangaluit, Qasigiannguanukaanneqarput.
Taakku sapaatiummat Uummannamukartussaangaluarput, Uummannallu eqqaani pisut tunngavigalugit, Royal Greenlandip sulisui Kinamiut ataasinngormat Ilulissaniik Qasigiannguanukaanneqarput.
- Uummannami eqqaanilu pissutsit pissutigalugit suleqatitaavut maannakkut Uummannaliartissallugit siunertaqanngimmat Qasigiannguliaanneqarallassapput taavaniikkallassappullu Uummannap eqqaani pissutsit nalinginnaaqqilernissaata tungaanut, Royal Greenlandip suliffeqarfissuarmi sulisoqarnermi ingerlatsisua, Søren Olsen Damgaard, suliffeqarfiup nittartagaani oqarpoq.
Ilisimaneqareersutut nunaqarfimmi Nuugaatsiami arfinngormat aseruatitserfioqisumik tassaarsuarmik eqqorneqareerneratigut nunaqarfimmi innuttaasut qimagussortinneqareernerini ippassaq sapaammi Royal Greenlandip Uummannami nunaqarfinnilu Ikerasaani, Saattuni, Ukkusissani aammalu Nuugaatsiami tunisassiorfiinut tunisineq unitsikkallarneqartoq nalunaarutigaa.
- Suleqatitaavut ullumikkut Ilulissanut apputissapput kingorna angallammik Qasigiannguanut ingerlanneqassallutik. Qasigiannguani isumagineqassapput Uummannami eqqaanilu pissutsit ersarinnerusumik paasisaqarfiginissaata tungaanut, Søren Olsen Damgaard oqarpoq.