Kinamiut periarfissarititaat atorluarniaraanni Nunarput ilungersortariaqarpoq

Qaammatip siuliani Kina pisortatigoortumik Issittumi periusissaminik White Paperimik taaguuteqartumik nalunaaruteqarpoq. Allagaq tupaallannartunik imaqanngilaqm kisianni Kinap immikkoortoqarfimmi soqutigisaqarneranik aalajangersasoq, ilisimatuut arlallit naliliipput.

Tamatuma saniatigut Kinap Issittumi anguniagai aamma 'Polar Silkevej'-imik pilersitsinissamut pilersaaruteqarnera Kalaallit Nunaannut periarfissanik aamma unammilligassanik peqartut nalilerneqarpoq.

- 'Polare Silkevej'-imik pilersaaruteqarnermi kinamiut issittumi aningaasaliinissaannik malitseqartussaanerani periarfissat tassaniipput, Camilla T.N. Sørensen, Forsvarsakademietimeersoq Sermitsiaq.AG-mut oqarpoq. Taanna kinamiut White Paperiliaannik misissueqqammerpoq.

Kalaallit Nunaannut tunngatillugu silap pissusianik avatangiisinillu ilisimatusarnermut tunngatillugu nukittunerusumik suleqatigiinnermut aningaasaliinerit assersuutaasinnaapput. Aamma qaammataasat issittumi atorneqarnissaannut ilisimatusarnermut 'Polare Silkevej'-imullu tunngasut teknologimik nutaamik ineriartortitsinermut atorneqartussanut tunngasinnaapput.

Nutaamik allanut atanerulersinnaaneq
Kalaallit Nunaat eqqarsiarluaraanni kinamiut aningaasaliinerannik iluqutsersorsinnaasoq, New Zealandimioq ilisimatooq Anne-Mary Brady isumaqarpoq.

Kinap Kalaallit Nunaannut soqutiginninnera periarfissanik navianartunillu peqarpoq. Kalaallit Nunaata Danmarkimut atanini Kinamut atanermik taarsersinnaanera navianartoqarpoq, tamatuma Kalaallit Nunaat ullumikkut isumaqatiginninniarsinnaanerminik periarfissaqannginnerulissaaq, taanna Sermitsiaq.AG-mut oqarpoq.

Soqutiginninneq toqqaannartumik Kalaallit Nunaannut attuumassutilik
Kina ataatsimut isigalugu naalagaaffinnut nutaanngulersunut soqutiginnittoq attaveqalernissamillu ilungersuuteqartartoq, Anne-Mary Brady nassuiaavoq.

Nunanut allanut naalakkersuisoq, Suka K. Frederiksen (S) januaarumi kinamiut aallartitaannit nutaamit tikilluaqquneqarnera arajutsisassaanngitsoq, Camilla T.N. Sørensenip misissuinermini oqaatigaa. Tamatuma saniatigut kinamiut Naalagaaffeqatigiinnerup iluani atassuteqarnernut tunngatillugu danskinik qalleraanissamik suli soqutigisaqanngilluinnarput.

Oqaloqatigiinnerup pitsaasup oqqannerit taarsissavai
Kalaallit Nunaatalu kinamiut soqutiginninnerat iluaqutigissappagu, taakku atassuteqaatit sukkanerpaamik qanimut isiginiarneqartariaqarput, Camilla T.N. Sørensen naliliivoq.

- Kinamiut soqutiginninnerannut tunngatillugu København aamma Nuuk oqaloqatigiinnermut pitsaanerulernissaannik tamanna pisariaqartitsivoq, taanna oqarpoq.

Nukissat assortuunnermut atorneranut taarsiullugu ammasumik pitsaasumillu oqaloqatigiinnissamik pisariaqartitsisoqartoq Camilla T.N. Sørensen oqarpoq, soorlu Isuani piiaaffiup oqallisigineqarnera assersuutaasinnaavoq, kingullermillu Kinamiut ingerlatseqatigiiffiata Kangillinnguit pisiarinissaanut soqutiginninnerata oqallisigineqarnerani pisoq.

- Ullumikkut pisut kalaallit tungaannit tatiginninnginnermik aamma danskit attuinissamik qunugisaqarnerannut tunngasorujussuupput.

Ilungersorluni sulineq
Danmarkip aamma Kinap suleqatigiinnermut isumaqatigiissutaani kingullermi Issittoq ilaatinneqanngitsoq, Camilla T.N. Sørensenip oqaatigaa. Naalagaaffinni issittumiittuni allani soorlu Norgemi, Finlandimi aamma Islandimi Issittoq pillugu apeqqut suleqatigiinnermi annertuumik ilaavoq. Tamanna danskit naalakkersuisuisa aamma Naalakkersuisut akornanni oqaloqatigiinnissamik amigaateqarnermut tassunga takussutissaavoq.

- Danmarkip imaluunniit Kalaallit Nunaata Kinap Issittumiileraluttuinnarnera kisimiillutik aqussinnaanngilaat. Taamaalillutik aamma iluaqutigisinnaanagu.

Naalakkersuisut ilungersornerusariaqartut, Anne-Mary Bradyp aamma oqaatigaa. Tassami Kinamuinnaq tunnganngilaq. Kinamiut soqutiginnileraluttuinnarnerata USA aamma qisuariartittussaavaa.

- Kinamit aamma illuanit USA-p periusissatut soqutigisaannut tunngatillugu suliaqarnissamik, Kalaallit Nunaat innuttaasunik killilimmik isumalluutarnini pissutigalugu nukilaatsumik inissisimavoq. Naalakkersuisut ilungersuutissarpassuaqarput, Anne-Mary Brady naqissusiivoq.

Kinap pilersaarutai pillugit paasisaqarnerugit:

Bloggeri: Kinap oqaatiginngisai soqutiginarput

Issittoq eqqissisimasuunissaa Kinap inassutigaa