tv-piviusulersaarut
Kinamiut kalaallimik ullormi uani inuusumik ujartuipput
Kinamiut tv-kkut aallakaatitassiaat 50 millioninik isiginnaartoqartartoq, nunarsuaq tamakkerlugu inunnik ullormi aalajangersimasumi inuusunik ujartuivoq
Ullormi aalajangersimasumi Kalaallit Nunaanni inuunikuuguit, tassa oktoberip tallimaani 1990-imi, taava inuit ikitsuinnaat inuunerminni misigisassaannik immaqa kinamiut tv-anni saqqummernissamik periarfissaqarput.
Tuluit tv-annit arsartartunik nuannarinnittunik pissarsiortoqarnerata kinguninngua kinamiut aamma Kalaallit Nunaannit pissarsiorput.
Yang Fan ujaasisoq
Tassami kinamiut tv-imik aallakaatitassiaat nuannarineqarluartoq, 'Another me in the world', inummik tassani ullormi 1990-imi inunngorsimasumik ujaasivoq.
Aallakaatitassiami inuttatut pingaarneq tusaamaneqartoq, Yang Fan, tuluit tv-anit ujartuisut assigalugit, ikiorneqarnissani neriuutigalugu Visit Greenlandimut saaffiginnissimavoq.
Motorcykelimik angalasoq
- Taanna kinamioq inuusuttoq motorcykeliminik nunarsuarmi angalaarpoq kulturerpalaartumillu inunnik aallakaatitassiortarpoq, maannakkorpiarlu angut arnarluunniit inuusuttoq oktobarip tallimaani 1990-imi inuunikoq ujartorpaa. Taassuma saniatigut isiginnaartartut millionilippassuit nunap kulturianik avatangiisianillu isiginnaartinneqassapput, taamaalilluni aamma aallakaatitassiaq angalanermut tunngasuuvoq, Malik Milfeldt nassuiaavoq.
Københavnip turisrådia inummik taassuminnga nassaaqqammerpoq, taanna Yang Fanip aallakaatitassiaani Danmarkimut tunngasumi peqataassaaq, Visit Greenlandillu maanna inuk taanna Kalaallit Nunaanni nassaarinissaa neriuutigaat, naak periarfissat annikinnerugaluartut.
Ikiorneqarnissamik neriuuteqartut
- Marluk imaluunniit pingasut ullormi tassanerpiaq ukiumilu tassani Kalaallit Nunaanni inunngortoqarsimassasiq neriuginarpoq, maannakkullu neriuutigaarput nassaarissallugu, aammalu immiussinernut peqataajumassasoq, pilersaarutit malillugit juunimi pissaaq.
Aallakaatitassiortut naapertorlugit isiginnaartartut 50 millionit missaaniipput.
Takornariartitsinermut siunnersuisooqatigiinnut attavissaq
Ullormi tassani inunngorsimaguit Visit Greenland attaveqarfigiuk, malik@greenland.com, imaluunniit tassani ullormi inunngortumi nalunngisaqaruit, taama kajumissaarisoqarpoq.
Atuaruk: Tv-liortut Manchester Unitedimik aamma Citymik nuannaartorinnittunik ujartuipput
Yang Fanip inunnik ullormi tassani inunngorsimasunik ilisarititsinerminut saqqummiinera uani takuuk