GME

Kinamiut GME-p aktiaanik pisinissaat aktiaatillit akueraat

Shenghep GME-p aktiaataasa 12,5 procentiinik pisinissaa maanna akuerineqarpoq

Greenland Minerals and Energymi aktiaatillit, aktianik piginneqataassutit 12,5 procentiisa Kinamiunut Shenghekkunnut tunineqarnissaat akueraat. Tamanna Australiamiut nittartakkakkut atuagassiaanni Proactive Investorsimi atuarneqarsinnaavoq.

Taamaalillunilu tamatuma ataatsimeersuarnermi Australiamiullu oqartussaasuisa akuersinerisigut, Kinamiut aningaasaliinissaat maanna akuerineqarpoq.

Pisinissamik kaammattuut
Pisinissamik kaammattuut akuerineqartoq Australiamiut niueruteqartarfiannit RM Researchiminngaannerpoq.
Taakku sullitaminnut aarlerinaatilinnik aningaasaliiumasunut piginneqatigiissutit 0,23-imik nalilerlugit pisiarissagaat kaammattuutigaat, tamannalu pappiaqqat maanna nalingannit qaffasinnerungaatsiarpoq.

GME Shenghemik suleqateqarnermigut aatsitassanik qaqutigoortunik niuerfinni annertuumik ingerlatsisumik suleqateqalernissaa kaammattuuteqarnermut tunuliaqutaavoq. Tamatumalu saniatigut qalluinissamik akuersissummik qinnuteqaatip naammassinissaa qallisoq RM Research naliliivoq.

ATUARUK: Kiinamiut GME-mik tigusinissaat akuersissummik pisariaqartitsivoq

Tamannalu naalakkersuisooqatigiit taarserneqarnerisa kingorna uranimik qalluinissaq pillugu isumaqatigiinngissuteqarneq patsisigalugu, Kuannersuarni suliniummik piffissami kingullermi eqqissiviilliortoqaraluartoq pivoq.

ATUARUK: Naalakkersuisoqatigiit uran pillugu apeqqut pinngitsoorsinnaavaat

Amerikamioq aningaasaliisarfiat
Kingullermillu Amerikamiut aningaasaliisarfiat aamma soqutiginnilluni nalunaarpoq, GME-llu aktiaataanik 4,6 million dollarinik naleqartumik pisinissani oqaatigalugu, taama Proactive Investor oqaluttuarpoq.

Aningaasaliisarfillu taanna tassaavoq Global X Management Company, taannalu taamaalilluni Shenghep pisiaasa pingajorarterutaasa missaannik aktiaateqalerpoq.

ATUARUK: GME-p qinnuteqaataa sivitsortoq

Qaammat sinnilaarlugu matuma siorna Shenghep pisinissamik nalunaaruteqarnera aalassatsitsivoq, taamaaliornermimi Shenghep kingusinnerusukkut aktiat 60 procentiinik pisinissaanik isumaqatigiissuteqarsimanera nalornisitsimmat. Apeqqullu tamanna pillugu suli erseqqissumik nalunaaruteqartoqanngilaq

Powered by Labrador CMS