Kinami suliffeqarfinnik nittarsaaniarluni angalaneq iluatitsiffiulluartoq

Naalakkersuisut Siulittaasuat Kim Kielsen, Inuussutissarsiornermut Suliffeqarnermut Niuernermut Nukissiuuteqarnermullu Naalakkersuisoq Hans Enoksen, Aalisarnermut Piniarnermullu Naalakkersuisoq Karl Kristian Kruse aammalu Aatsitassanut Ikummatissanullu Naalakkersuisoq Múte B. Egede 2017-imi oktobarip 29-anniit novembarip sisamaata tungaanut suliffeqarfinnik nittarsaaniarlutik Kinami angalapput.

Kim Kielsenip Karl Kristian Krusellu pisortatigoortumik tikeraarnertik aallartippaat Kinami nunanut allanut naalakkersuisoqarfimmi Kinamiut Nunanut allanut Naalakkersuisup tullersortaa Wang Chao ataatsimeeqatigalugu.

Ataatsimiinnermi Issittumi ilisimatusarnikkut suleqatigiinnissamiut periarfissat eqqartorneqarput, taamatullu silaannarmut tunngasut, attaveqaatititgut Nunatsinni ineriartortitsinissaq kineserillu Nunatsinni takornariartalernissaannut periarfissat, kalaallit aalisakkanik Kinamut tuniniaasarnerat, aatsitassarsiorneq aammalu aatsitassarsiornerup Nunatsinni ineriartortinneqarnissaa, ilinniartitaaneq aammalu Issittumi Siunnersuisoqatigiinni Kalaallit Nunaata, Danmarkip Kinallu suleqatigiinnerat, Namminersorlutik Oqartussat tusagassiuutinut nalunaarummi allapput.

CPIFA-p ataatsimeeqatigiinnerata kingorna Naalakkersuisut Siulittaasuat Kim Kielsen aamma Naalakkersuisunut ilaasortaq Karl Kristian State Oceanic Administration (SOA – Naalagaaffimmi Imartat pillugit Aqutsisoqarfik) ataatsimeeqatigaat, tassanilu siunissami avatangiisit sermerlu pillugit ilisimatusarnissamut periarfissat eqqartorneqarput, aammattaaq Kinap Nunattalu akornanni ilisimatusarnermi suleqatigiinnissamut atsioqatigiissimaneq naapertorlugu siunertaliunneqarsimasut qanoq malersoqqinneqarsinnaanersut eqqartorneqarlutik.

Mittarfinnut suliniutit

Hans Enoksen Kalaallit Airports A/S-imi sinniisut peqatigalugit saniatigut allanik, ilaatigut makkuninnga kineserit sanaartornermik isumaginnittut aningaasaateqarfiillu.

- Aqaguani sanaartortitsinermik suliffeqarfiutillit China Communications Construction Company Ltd. (CCCC) aamma Beijing Construction Engineering Group (BCEG) ataatsimeeqatigineqarput. Suliffeqarfiit taakku marluk mittarfiliornermik aallutaqartut Kinami anginersaaginnaratik nunarsuarmi anginersat ilagaat, Namminersorlutik Oqartussat allapput.

Ataatsimiinnermi tassani Nuummi, Ilulissani Qaqortumilu mittarfissat eqqartorneqarput, 2018-ip aallartinnerani suliarinnittussarsiortoqalerpat kineserit peqataatissinnaanissaat periarfissinniarlugu.

Tamatuma kingorna aallartitat kinami aningaaserivissuaq avammut tunisassiornermut eqqussuisarnermillu aallatuaqartartoq EXIM ataatsimeeqatigineqarpoq mittarfissat aningaasalerneqarsinnaanerinut periarfissat pillugit.

Suleqatigineqarsinnaasut

Aatsitassanut Ikummatissanullu Naalakkersuisoq Múte B. Egedep Ministry of Land and Resources suleqatigiinnissamut isumaqatigiissusiornissaq pillugu ataatsimeeqatigai, tassunga ilaapput paasissutissanik taartigeeqatigiinnissaq aammalu siunissami suliassanut tunngasuni suleqatigiinnissaq.

Aammattaaq ingerlatsivissuaq China Mining Association (CMA) ataatsimeeqatigineqarpoq.

Marlunngormat Naalakkersuisunut ilaasortat sisamat peqatigiillutik suliffeqarfinnik nittarsaapput Greenland Day-imik taallugu (Kalaallit Nunaat pillugu ulloqartitsineq) Beijingimi qallunaat aallartitaqarfianni ingerlanneqartoq.

- Inersuaq ulikkaaqqasoq Namminersorlutik Oqartussat, Kalaallit Airports A/S, Nukissiorfiit, Airgreenland, Visit Greenland aamma Albatros Travel (Kina) saqqummiussipput inuussutissarsiutitigut, mittarfitsigut, erngup nukissiuutigineranut, takornariaqarnikkut, rubinisiornikkut imeqarnikkut il.il. Nunatsinni suliniutit periarfissallu nunatsinnni qanoq innersut paasisitsiniutigalugit.

Nittarsaassineq

Polar Seafoodip kingorna kalaallit nerisassiaataat kineserinut misilitsippaat.

Tamatuma kingorna kineserint tusagassiorfiinut tusagassiortunik aggiaffiulluartumik katersortitsisoqarpoq, ilaatigut apeqqutigineqarput erngup nukinga pillugu nukissiornermut tunngassutillit, ilisimatusarnermut, takornariaqarnermut aammalu nunatsinni uuliasiorneq gassimillu qalluinermut tunngasut.

Nunatsinnit angalasut pingasunngorpat Qingdaoimut ingerlaqqissapput, tassani kalaallit aalisakkanik tunisassiorfii nittarsaakkiartorneqassallutik.