Kinamut tikeraarneq
Kinami aatsitassarsiornermut ulloritinneqartoq ornigarneqarluartoq
Aatsitassanut Ikummatissanullu Naalakkersuisoq novemberip aallaqqaataani Kinami Beijingimi Kalaallit Nunaata aatsitassarsiornermut ullorititamik aaqqissuilluni qaaqqusisuuvoq. Aaqqissuussineq peqataaffigineqarluarpoq, tassani Kinamiut ingerlatseqatigiiffii aamma aningaasaliisartut Kalaallit Nunaanni aatsitassarsiornermut suliassaqarfik pillugu annertunerusumik paasisaqarnissamut periarfissaqarlutik.
Ingerlatseqatigiit aatsitassarsornermut tunngasunik suliaqartut assigiinngitsut 30-t missaaniittut peqataapput, taakkununnga ilaallutik China Mining Association, General Nice, China Nonferros, Shenghe ingerlatseqatigiiffiillu saviminissanik, guultimik aatsitassanillu qaqortigoortunik suliaqartut.
Namminersorlutik Oqartussat tugassiuutinut nalunaarummi paasissutissiipput.
Aamma atuaruk: Naalakkersuisut Kinami pilerisaariartorput
Aatsitassarsiorfik pilerinartoq
Aatsitassanut Ikummatissanullu Naalakkersuisup aallarniutaasumik oqalugiarnermini erseqqissarpaa, Kalaallit Nunaanni pilerinaatilimmik aatsitassarsiornermi suliffissuaqarnikkut siuariartortitseqqinnissamut annertuunik periarfissaqarfiusunik ingerlatsisoqartoq.
- Taamaattumillu Kina-mi ingerlatseqatigiiffiit aamma aningaasaliisartut suliassaqarfimmi ineriartortumut peqataanissamut periarfissaqarluartut, Múte Bourup Egede ilaatigut oqarpoq.
Aatsitassanut Ikummatissanullu Naalakkersuisup oqalugiaataata kingorna ingerlatseqatigiiffit nunatsinni suliaqartut arlallit saqqummiipput, taakkua nunatsinni aatsitassarsiorluni suliassat neriulluarnartut arlallit saqqummiullugit.
Soqutigineqarluarnera iluarisimaaraa
Aatsitassanut Ikummatissanullu Naalakkersuisup peqatigisaanik kissaatigaa, aatsitassanut ulloritinneqartoq Kalaallit Nunaata Kina-p ilinniarfigisinnaanissaanut periarfissiiffiussasoq. Taamaattumillu Kinamiut ingerlatseqatigiiffiit saqqummiinissaannut piffissaliisoqarpoq.
- Kalaallit Nunaanni aatsitassarsiornermut suliassaqarfimmut soqutiginninneq Kina-miut peqataasut takutimmassuk iluarisimaarpara. Peqatigisaanik Kina-mi aatsitassarsiornermut suliassaqarfimmi misilittagarineqartut soqutigalugit tusarnaarpunga. Nunatta Kinallu suliassaqarfimmi tassani ilinniarfigeqatigiissinnaasut qularutiginngilara suleqatigiilluarnerullu ingerlaqqinnissaa qilanaaralugu, Múte Bourup Egede tusagassiuutinut nalunaarut naapertorlugu oqarpoq.
Isumaqatigiissuteqarneq
Aaqqissuussap saniatigut Aatsitassanut Ikummatissanullu Naalakkersuisup Ministry of Land and Resources aamma China Mining Association Kinami aatsitassarsiornermik ingerlataqartut kattuffiat ataatsimeeqatigai. Ataatsimeqqatigiinnerni suleqatigiinnerunissaq aallartisarniarlugu suleqatigiinissamik isumaqatigiissusiortoqarnissaa isumaqatigiissutigineqarpoq. Suleqatigiinnissamik isumaqatigiissutissat ilaatigut paasissutissanik avitseqatigiinnermut attaveqaatinillu pilersitsinissamik siunertaqassallutik.
Suleqatigiinnissamut isumaqatigiissutit taakku marluk Kinami aatsitassarsiornermi ingerlataqartunut suleqateqarnerulernissamik politikkikkut niuernikkullu aqqutissiuisuusussaapput.