aatsitassat
Kina-mi suliffeqarfissuit ilaat Kuannersuarni piiaanissamut peqataarusuttut
Kina-mi aatsitassarsiorlutillu sanaartornermik suliaqartartut, nunarsuarmi suliffeqarfiit annersaasa ilaanniittut, Greenland Minerals & Energy suleqatigiinnissamik isumaqatigiissuteqarfigaat
Nunatsinni suliffeqarfissuaq China Non-Ferrous Metal Mining Group tusarneqarpallaarnikuugunanngilaq. Aviisili Berlingske nalunaarpoq suliffeqarfik Kina-mi aatsitassarsiorlutillu sanaartornermik suliaqartartut Greenland Minerals & Energy (GME) suleqatigiinnissamik isumaqatigiissuteqarfigigaat. GME Kuannersuarni aatsitassarsiornissamik suliaqarnissamik pilersaarusiortuuvoq.
Kuannersuarni Narsap eqqaaniittumi aatsitassarsiulernissaq taamaasilluni qanilliallappoq.
Aviisip Berlingskep nalunaarutigaa GME-p suliffeqarfik China Non-Ferrous Metal Mining Group-ip piginneqatigiiffia China Non-Ferrous Metal Industry’s Foreign Engineering and Construction (NFC) suleqatigiinnissamik isumaqatigiissuteqarfigisimagaa. Isumaqatigiissut pilersaaqatigiinnermik isumaqatigiissutaasoq qaammammi uani atsioqatigiittoqarsimasoq aviisi nalunaarpoq.
NFC nunarsuatsinni nutaaliaanerpaamik, anginerpaamik teknologimilu siuarsimanerpaamik aatsitassanik qaqutigoortunik piiaaniarluni nalunaarpoq, 1,5 milliard koruuninillu akileeqataassalluni.
GME-p Kuannersuarni pilersaarutaa akuiaaveqassaaq talittarfeqassallunilu. Fabrikkip 4,3 milliard koruunit 4,9 milliard koruunillu missaanni akeqassasoq naatsorsuutigineqarpoq.
Berlingskemi nutaarsiassaq atuarneqarsinnaavoq (Qallunaatuinnaq allaqqavoq)
Suleqatigiinnissamik isumaqatigiissut pillugu aviisimi saqqummersartumi AG-mi aamma atuarneqarsinnaavoq