Kimmernaq kuultimik nuutinnappoq

Kimmernaq Kjeldsenip cd saqqummersitaa ´Uani´ maanna 3.000-t sinnerlugit tunineqarsimavoq, taamalu kuultimik nuutinnassutigalugu. Tamanna malunnartinneqassaaq ukioq manna kulturip illorsuani Katuami naggataamik tusarnaartitsinermi decembarip 28-anni pisussami.
Kimmernaq Kjeldsenip upernaaq Frederik Elsner; Nanook-meersoq, suleqatigilerpaa, taassuma saqqummiussassaanut erinnat sanallugit. Kimmernaq Kjeldsen aappassaa cd-mik saqqummersitsivoq, siusinnerukkut ´Tunissut´ saqqummersissimagamiuk.
– Nuannaarutigeqaarput cd taama tunisaalluartisimammat piffissami kikkut tamarmik cd-nik tunisiuminaatsinerujussuanni, Frederik Elsner oqarpoq, taannalu erinarsuusiortarnermi saniatigut nuutinik saqqummersitsisarfimmi Atlantic Music-imi sulivoq.
Katuani tusarnaartitsinissaq
Maanna ukioq manna decembarip 18-anni Katuami tusarnaartitsinissaq piareersarneqarpoq, tassani kuultimik nuutinnattaaq malunnartinneqassalluni. Qilanaartuuserineqassapput Suaasat aamma Labrador ´Kangian´, tv-kut quiasaarisartutut ilisimaneqartut.
– Qularutiginngilara tusarnaartitsineq nuannissaqisoq, Frederik Elsner oqarpoq.