debat
Kimmernaq: Asasara qimaasoq, tikilluarit
Kalaallit Nunaat qimaasunik tigusisalissanersoq oqallisigineqarneranut Kimmernaq Kjeldsen maanna ilannguppoq. Siunnersuummut akeqqersimaarluni qisuariarneq taassuma tupaallaatigaa.
Kimmernaq Kjeldsenip erinarsornermini suaartarneq atornerusaraluarpaa. Kisianni uani sapaatip-akunnerani qimaasunut tunngatillugu ammanerulernissamik oqariartuuteqarpoq.
AG-mi uani sapaatip-akunnerani saqqummertumi tamanna pivoq.
ATUARUK: Siumup Inuusuttunut Suleqatigiiffiat: Qimaasunik tigusisariaqarpugut
Siunnersuummut qisuariarneq isornartorsioraa
Nunarput qimaasunik tigusisalernissaa Siumup Inuusuttunut Suliniaqatigiiffiata januaarip naalernerani siunnersuutigaa. Taamaalillutik siornatigut Inuit Ataqatigiit siunnersuutigisimasaat taperserpaat.
Kimmernaq Kjeldsenip siunnersuutigineqartoq pivallaanngilaa, kisianni siunnersuutip qisuariarfigineqarnera.
- Qanoq akeqqersimaartiginera tupaallaatigisorujussuuara, taanna isummersorfimmini allappoq.
Siumup Inuusuttunut Suliniaqatigiiffiata siunnersuutaa pillugu allaaserisaq uani nittartakkami oqallisigineqarluarpoq. Oqallittut amerlanerpaat isumassarsiamut itigartitsisuupput.
- Inuimmi siunnersuut pillugu annilaartorujussuupput, Kimmernaq Kjeldsen isumaqarpoq.
Atuaruk: Qimaasunut tunngatillugu siunnersuut amerlanerussuteqartunit akuersaarneqanngilaq
'Grønlandsk Folkeparti'
Taanna nammineq nunaqqatit isumageqqaarnissaannik aammalu allanik upperisallik 'inuiaqatigiit ajortunngortinnissaannik' oqariartuuteqartunut unnersuussivoq.
- Allaanngilaq imatut taaguutilimmik parteeqalersimasoq; ''Grønlandsk Folkeparti'', taanna allappoq.
'Ammasuunermik takutitsigitsi'
Nunarput qimaasunik maannakkut tigusissasoq Kimmernaq Kjeldsenip tunngavilersuuteqanngilaq. Kisianni apeqqummut isummersorneq oqallisigineqarnissaa pivaa.
- Ammasuusa nunarsuarmilu akeqqersimaarfiuleraluttuinnartumi maligassiuisuusa, taanna naggasiivoq.
Sermitsiaq.AG-p atuartartuminik taasititsinerani 72 procentit qimaasunik tigusisalernissamut akerliupput. Taamaallaat 26 procentit isummamut akuersaarput.
Kimmernaq Kjeldsenip isummersuutaa tamaat AG-mi atuarsinnaavat: