Kimmernap Maasillu TV-2-kut nipilersoqatigissavaat

Kalaallit nipilersortartut arfineq-marluk scenemeeqataasassapput TV-2-kut qaammammi matumani kingusinnerusukkut Nuummi, Sisimiuni Ilulissanilu tusarnaartitseqattaalerpata.

Nuummi tusarnaariat tusarnaarsinnaassavaat rappertartoq Maasi, Mads Pedersen, aamma Inunnguaq Petrussen kiisalu Kimmernaq Kjeldsen.

Sisimiuni Laura Aviana, Ilulissanilu Rikka Egede aamma Arnaq Leibhardt qaaqqusatut nipilersoqataassapput.

Nutaat pisoqqallu

TV-2-kut erinarsortartuata Steffen Brandtip tikkuarpaa niilersoqatigiit nipilersortartunik nutaanik tusaamasaanerusunillu nipilersoqaterusussimasut.

– Akulerussinnissaannik isuma nuannareqaarput, tassa nipilersortartut erinarsortartullu nutaat saqqummeriartortut tusaamasaanerusullu akulerutsillugit. Isumaqarpugut tamatta immitsinnit ilikkagaqarsinnaalluta. Isumaqarpugulllu pissanganartuusoq ilaatigut rappertartoq Maasi, nipilersortartut nutaat soorlu Rikka Inunnguarlu, aammalu ilisimaneqartoq ataqqineqartorlu Kimmernaq, nipilersoqatiginissaat, Steffen Brandt erseqqissaavoq.

Attaveqarfitik iluaqutigalugit

Nipilersoqatigiit TV-2-kut nunatsinni nipilersortartut nipilersoqatissatik nassaarisimavaat ilaatigut nunatsinni attaveqarfitik aqqutigalugit.

– Kalaallit Nunaanni nipilersornermik pisoqarneranik malinnaaniartarpugut, taavalu Kalaallit Nunaanni nipilersortartunit ikinngutitsinnillu ikiorneqartarpugut. Ilaatigut qatanngutigiit Elsnerikkut Nanook-meersut nipilersortartunik aperisinnaasatsinnik innersuussillaqqissimapput, Steffen Brandt oqaluttuarpoq.

Pop-imik nipilersortartup niperujoorutaa

Nipilersoqatigiit erinarsortartuata tusarnaariat tusarnaartitsinermi tusaasinnaasaasa ilamerngi oqaatigai.

Nuummi Maasip rapperluni ilaatigut atussavaa ´Popmusikerens vise´, taannalu siusinnerusukkut atortareersimavaa, erinarsuullu taanna TV-2-kut tusarnaartitsinermit CD-iaanni ´Sæler, hvaler og solskin´-imi, 2014-imi saqqummersinneqartumi ilaavoq.

Asanninnera

– Tamatuma saniatigut Maasi akuersisimavoq Mark Ronsonip sanaavanik ´Uptown funk´-imik nutaamik mashup-imik taaneqartumik sanaarput atorniarlugu. Taavalu Kimmernaq erinarsukkatsinni ´Hele verden fra forstanden´ erinarsoqataassaaq, taassumalu atugaani ´Asanninnera´ nipilersoqataassaagut. Inunnguullu ´Randers Station´ atussavaa. Tamatumalu saniatigut taassuma sanaava ´Aniguma´ ilinniaraluassavarput, Steffen Brandt oqarpoq.

Inuuneq nuannersoq

Tamatuma saniatigut naalagaaffeqatigiinni nipilersoqatigiit pikkunaannersaattut imminnut taasut ilaatigut nuusiaminnit kingullermit ´Det gode liv´, marsimi saqqummersumit, nuannarineqarnerit atortassavaat.

– Kiisalu qanga nuannarineqaatitta ilaat, nalunngisatta imaluunniit neriuutigisatta, kalaallit aalajaatsumik nuannarinnitsitta nuannarilluagaasa ilaat atortarumaarpavut, Steffen Brandt oqarpoq.