namminiilivinneq
Kim: Namminiilivinnissamut aqqut aalajangerneqareerpoq
Naalagaaffeqatigiit naapeqatigiinnerini Kim Kielsenip namminiilivinnissamut aqqut aalajangereerneqareersimasoq erseqqissarpaa – arlalinnilluunniit unammilligassaqaraluarpat.
Nipaa isikkualu aalajangiusimapput. Tassa Kim Kielsenip (S) ersarissumik oqaaseqarniartilluni ilisarnaatigilluangaa.
- Namminiilivinnissamut aqqutissaq aalajangerneqareerpoq, aqqutaanilu sangujoraartoqassanngilaq. Aqqut taanna ingerlaffigissavarput.
Løkkep ilisimavaa
Naalakkersuisut siulittaasuata apeqqarissaarfigineqarnermini oqaaseqarnini arlaleriarlugu uteqattaarpaa.
Naalakkersuisoqatigiillu tamanna aamma anguniangaasoq, naalagaaffeqatigiit naapinnerini ministeriunermut Lars Løkke Rasmussenimut arlaleriarluni aamma oqaatigisarsimallugu, taassuma oqaatigaa.
- Namminiilivinnermut ingerlasugut, ministeriunerup ilisimavaa. Tamannami 1979-mi Namminersornerulluni Oqartussaaneq eqqunneqarmallu atuutilereersimasoq, Kim Kielsenip (S) oqaatigaa.
Kalaallit Nunaat peqataatinnagu Danmarki minnerulissaaq
Lars Løkke Rasmussenip arlaleriarluni oqaatigaa, Kalaallit Nunaat aniniarluni nalunaaruteqarpa naalakkersuisunit ajuusaarnartutut isigineqassasoq namminerlu tamanna aliasuutigissallugu.
- Kalaallit Nunaat Naalagaaffeqatigiinnermit anissappat danskit naalakkersuisuinit tamanit tamanna aliasuutigineqartussaavoq, tassunga tunngatillugu Kim Kielsen taama oqaaseqarpoq.
- Danmarki massakkut nunarsuarmi nunani anginerpaanut 11-unngikkiuni 12-iuvoq, Kalaallit Nunaallu anippat 131-nngussalluni.
Lars Løkke Rasmussenip (V) Kalaallit Nunaata namminiilivinnissaa siunissami ungasissumiinnerarlugu, arlaleriarluni oqaatigisarsimavaa. Aningaasaqarnikkut unammilligassat annertuallaaqaat, taanna nalilersuivoq.
Tunngaviliisoqassaaq
Aningaasatigut unammilligassat annertuujusut, Kim Kielsenip (S) nassuerutigaa. Kisianni Naalakkersuisut tamakku tamaasa suliarileraat ilanngullugu oqaatigaa. Namminiilivinnissamummi tamanna aqqutissatut isigaa.
- Kinguaariit tulliisa qajannaatsumik tunngaveqarnissaat qulakkiissavarput, taamaasillutik nammineq aalajangersinnaalissammassuk Kalaallit Nunaata nammineertup qanoq isikkoqarnissaa.
Naak Kim Kielsenip (S) ilisimangaluarlugu namminiilivinnissamut ingerlaarnermi siuttuulluni, qularinngilluinnarpaa Nunatta namminiilivinnerani siuttuussanani.
- Ullut tamarluinnaasa angajoqqaatut makittarput, pissusissamisoorpullu ima imminut aperisarnera: Meeqqama ernuttamalu siunissaat pitsaanerutikkumallugu qanoq iliuuseqarsinnaavunga.
- Taamatulli ullut tamarluinnaasa namminiilivinnissaq pillugu tunngavilersueqataallungalu suliaqartuarpunga, Naalakkersuisut siulittaasuat, Kim Kielsen (S) taama oqarpoq.
Kim Kielsenip namminiilivinnissamut takorlugai pillugit allaaserisaq pingasuusuni siulliuvoq. Allaaserineqartussani tulliuttuni taassuma namminiilivinnissamut qanoq tunngavilersuisoqassanersoq itisilersussavai.