Saammaateqatigiinnermut isumasioqatigiissitaliaq
Kim Leine: Saammaateqatigiinneq pisariaqarpoq
Atuakkiortup Kim Leinep Saammaateqatigiinnermut isumasioqatigiissitaliaq assortuussutaasoq taperserpaa. Isumasioqatigiissitaliaq pisariaqarpoq ilaatigut pisariaqarmat qallunaat nunasiaqarsimasutut imminnut pisuutinnerat qaangerniarlugu, taanna isumaqarpoq
Atuakkiortoq Kim Leine naapertorlugu Saammaateqatigiinnermut isumasioqatigiissitaliaq, siorna pilersinneqarami assigiinngitsunik isumaqarfigineqarsimasoq, tapsersersussallugu tunngavissaqarluarpoq. Isumasioqatigiissitaliamik tapersiivoq arfininngormat Jyllands-Postenimi isumaliutersuutikkut.
Isumaliutersuummi Leinep ilaatigut Tholrkild Kjærgaard, Ilisimatusarfimmi dr. phil., isornartorsiorpaa taassuma Danmarkip nunasiaqartuusimanera apeeqqusermagu, tamannalu peqatigalugu ministeriuneq Helle Thorning-Schmidt isornartorsiorpaa oqarsimammat saammaateqatigiinnermut isumasioqatigiit taamaattut psariaqartinneqanngitsut.
– Naluara Thorning nalunaarami ´Uagut saammaateqatigiinnissaq pisariaqartinngilarput´, oqaatsimi ´uagu´ pineraa ´uagut kunngikkormiut´ imaluunniit qallunaat innuttaasut tamaasa sinnerlugit taamatut oqarnersoq. Isumaga malillugu taakkua marluk assigiissumik ajornartorsiutaapput, Kim Leine allappoq.
Imminut pisuutinneq aporfiit annersaraat
Atuakkiortup tikkuarpaa qallunaat nunasiaqartuusimanerminnut atatillugu imminnut pisuutinnerat aporfissat annersarigaat, Kalaallit Nunaata Danmarkillu saammaateqatigiinnissaannut.
– Imminut pisuutinneq kingumut qiviarnermik tunngaveqarpoq. Kingumut qiviarneruvoq soriarsinnaanngissuseqartitsisoq. Taamaasilluni iluuseqannginnissamut utoqqatsissutaasinnaavoq. Tassami pisuulluta nassuerutigigutsigu inuppalaartuusimassanngilagut! Akerlianik silatusaartumik misissuineq atortussaavoq siumut tikkuussisoq: Qanga pisut sunik ilinniarfigisinnaavagut? Tassa saammaateqatigiinnermut isumasioqatigiissitaliap suliassaasa ilaat, Kim Leine isumaliutersuummini allappoq.