oqallinneq
Kim Leine: Kalaallit Nunaat maanna namminersulivittariaqarpoq
Atuakkiortoq Kim Leine isumaqarpoq Kalaallit Nunaat namminersulivissutut maanna aallartittariaqartoq kingunerilu takullugit
Nunatsinni partiit anguniagaraat namminersulivinnissaq. Namminersornerulli 2009-mi atuutilernerata kingorna qaqugu namminersulivittoqarumaarnersoq ukiulerlugu suli taaneqanngilaq. Atuakkiortoq Kim Leine qallunaat atuagassiaanni Ræsonimi apersorneqarluni oqarpoq namminersulivinneq massakkorpiaq eqqunneqartariaqartoq.
Atuakkat ’Kalak’p aamma ’Profeterne i Evighedsfjorden’ip atuakkiortuat Kim Leine Nunatsinni namminersulivinnissaq pillugu oqallinnermut ilannguppoq.
Nakorsanik ilinniartitsineq
- Ataqqivara naalagaaffeqatigiinnerup ataannarnissaanik kissaateqartoqarnera. Tamanna politikkikkut oqallittut ilaannut pisariaqarpoq. Kisianni tamanna kalaallit kissaatiginngilaat. Naalagaaffeqatigiinnermit anerusupput Danmarkimillu ikinnguteqarneq attatiinnarlugu, Kim Leine Ræsonimut oqarpoq.
Taassuma ilimaginngilaa naalagaaffeqatigiinnermit aninikkut Danmarkimi ilinniarfiusinnaasunik annaasaqartoqarumaartoq. Taassuma Norge assersuutitut taavaa nunani allani nakorsanik ilinniartitsisarmat. Taamaammat qularinngilaq oqarnissaminut qaqugu Kalaallit Nunaat namminersulivissanersoq.
- Isumaqarpunga maannakkorpiaq Kalaallit Nunaat namminersulivittariaqartoq. Namminersulivinneq nalunaarutigisinaavaat takullugulu qanoq pisoqarumaarnersoq. Ilimaginngilara tamanna sapiissuseqarfigigaat kisianni tamanna siunnersuutiginiarpara arlaat naapikkukku, Kim Leine oqarpoq.
Taanna isumaqarpoq Kalaallit Nunaata Danmarkillu akornanni pissutsit allanngornavianngitsut Kalaallit Nunaat namminersulivippata, tassanilu innersuussutigaa Danmarkimi innuttaasut 18.000-it arlaatigut Kalaallit Nunaannut attuumassuteqarmata.