Kim Leine DR Romanprisen-imik nersornaaserneqarpoq
Januaarimi Kim Leine atuakkiaminik Profeterne i Evighedsfjorden-imik De Gyldne Laurbær-imik nersornaaserneqarpoq maannalu DR Romanprisen-imik nersornaaserneqarluni
DR Romanprisen ukioq manna Kim Leinemut tunniunneqarpoq atuakkiaa Profeterne i Evighedsfjorden pissutigalugu, P4-milu aallakaatitassiami ´Café Hack´-imi tunniunneqarluni. Tunniussineq pivoq ukiup affaani DR-ip naalaartartut atuartartullu peqatigalugit ukiumi qallunaat atuakkiaannik soqutinarnerpaamik toqqaaniareersullu.
´Profeterne i Evighedsfjorden´ pillugu naliliisut oqarput "eqqarsaatigilluagaasimasoq suliarilluagaallunilu - piviusut aammattaarli katiterneqarnera eqqarsaatigalugit. Atuakkiami immikkoortut tamarmik eqqarsaatigineqarsimapput, atuagarlu taamaattoq iserfigiuminartuuvoq", ilaatigut naliliisartut oqarput.
Taamatut allappoq. dr.dk.
Naliliisartut malilugit atuakkiap pitsaassuserpassuisa ilagigaat palasi Morten Falck:
"Pissusiata iliuuseqarneratalu atuartoq kissallatsissinnaavaa. Ilaatigut pissutigalugu pingaakujunniartuullunilu arnallu peqatigisani sussaanngitsumik pissusilersorfigiuarlugit. Tamannali peqatigalugu inuuvoq nutarteriniartoq siumullu isigisoq - immaqa 1700-ukkunni palasimut uppernanngingajattumik assuarlerumatuujunngitsoq, tamannalu pissutigalugu inuk soqutiginartuuvoq, ataasiinnarmut isigianngitsoq".
Kim Leine 1961-imi Norgemi inunngorpoq 17-inillu ukioqarluni Danmarkimut pilluni. Peqqissaasutut ilinniagaqarnermi kingorna ukiuni 15-ini, 2004-p tungaanut, Kalaallit Nunaanni sulivoq. Atuakkiaa siulleq 2007-imi saqqummerpoq, taamaattumik Kim Leine kingusissukkut atuakkiortalerpoq. Atuakkiaa ´Profeterne i Evighedsfjorden´ aamma 2013-imi Nordisk Rådip atuakkianut nersornaasiuttagaanik nersornaasigassatut inassutigineqarpoq, taannalu ukioq manna oktobarip 30-anni Oslomi tunniunneqassaaq.