Kim Larsen 72-nik ukioqarluni toquvoq

Kim Larsen sivisuumik kræfteqarluni napparsimareerluni sapaammi ullaakkut toqukkut qimaguppoq.

Danskit taalliortuat erinniortuat Kim Larsen sivisuumik napparsimareerluni, sapaammi ullaakkut eqqissilluni toqukkut qimaguppoq.

Tusagassiuutinut nalunaarummi tamanna atuarneqarsinnaavoq.

- Kim Larsen naggatissani tikillugu nuliaminit Liselottemit kiisalu meeqqaminit arfiniliusunit Pellemit, Sylvesterimit, Alice Evamit, Mollymit, Hjalmerimit aamma Luimit najorneqarpoq, taassuma tuniniaasia, Jørn Jeppesen, allappoq.

Piffissami sivisuumi Kim Larsen quumi aqqutaatigut kræfteqarpoq, taannalu aamma suliarineqaatiginikuullugu.

Ilisineq nipaalluinnartumik aamma qaniginerpaasat peqatigalugit pissasoq, ilisimatitsissutigineqarpoq.

Kim Larsen 1970-ikkunnili Danmarkimi nipilersortartuni tusaamasaanerpaat ilaattut ilisimaneqarpoq, nuutinillu millionilikkaanik tunisaqarnikuuvoq.

Kim Melius Flyvholm Larsen Københavnimi inuuvoq, tassanilu peroriartorluni. Taanna 1968-imi meeqqat atuarfianni ilinniartitsisunngorpoq.

Taanna Christianshavnimi Sofiegaardimut nuuppoq, kingorna Franz Beckerlee aamma Wili Jønsson naapippai, Bjørn Uglebjergilu peqatigalugu nipilersoqatigiit Gasolin’ pilersippaat.

Nipilersoqatigiit danskit rockertartut oqaluttuarisaaneranni taallanik pingaarutilinnik nunani tamalaani nuannarineqartunik pilersitsipput, erinnanillu qatsutassaanngitsunik, soorlu "Rabalderstræde" aamma "Kvinde min" pilersitsipput.

Gasolin’ 1970-ikkunni Danmarkimi tusaamaneqarnerusinnaanngillat.

Erinnat tuluttut taallartallit nunani tamalaani ilutsippallaanngillat, kisianni nipilersoqatigiit nuannarineqartorujussuupput, aamma 1978-imi avissaarnermi kingorna.

Larsen nipilersoqatigiit pisariaqartitaat sinnerlugit taalliorsimavoq, 1973-imilu kisimiilluni siullermik nuusiani ‘’Værsgo’’ saqqummersippaa, taannalu danskit nuusiortarneranni oqaluttuarisaarnermut ilannguppoq.

Taassuma ilaatigut nipilersukkat "Nanna", "Joanna", Byens hotel" aamma "Hvis din far gir dig lov" imarai.

Kim Larsenip nunani tamalaani iluatsitsinissani takorloorsimavaa, USA-mullu nuussinnarluni angerlaqqippoq.

Iluatsinngitsumik misiliinermi kingorna filmi ‘’Midt om natten’’ 1984-meersoq suliaralugu aallartippaa, tassani allaqataallunilu pingaarnertut inuttaavoq. Taassumalu aamma nipilersugartaasa annerpaartai allallugillu immiussarai.

Nuusiaq filmimit nipilersukkanik imalik danskit nuusiaanni tunisaanerpaat ilagaat.

/ritzau/

Powered by Labrador CMS