Kim Kielsen: Qinersisoqassanngilaq

Kim Kielsen ernumanngilaq. Tamanna Partii Naleraq naalakkersuisoqatigiinnit tunuarnerminik tupaatigineqaqisumik nalunaaruteqareersorlu sapaammi ualikkut Inatsisartut ataatsimiittarfiata illutaanit Naalakkersuisut Siulittaasuata Naalakkersuisoqarfiani allaffimmut teqeqqumiittumut ingerlanermini erseqqissaatigaa.

Taavami susoqassava?

Naalakkersuisut siulittaasuat kikkunnit tamanit utaqqimaarneqalerpoq. Qanoq iliornissaminik eqqarsaateqarpa?

- Partii Naleqqap tungaanit piffissami kingullermi sioorasaarinerpassuusimapput. Mittarfiliortiternissaq pillugu suliami pissutsit inissinnissaat uannut pingaaruteqarsimavoq. Maannalu kiisami isumaqatigiissuteqartussanngulerpugut, oqarpoq.
Partii Naleqqap naalakkersuisoqatigiinnit tunuarniarluni aalajangerneratigut Kim Kielsen pingasunik periarfissaqalerpoq: Partiinik tapersersorteqarluni ikinnerussuteqarluni naalakkersuisuutitaqarluni ingerlaannarsinnaavoq, imaluunniit naalakkersuisoqatigiinnik nutaanik pilersitsiniarsinnaavoq. Periarfissat pingajuat kingullersaallu tassaavoq qinersinissamik nalunaarutiginnninneq.

Kim Kielsenip aaqqiiissutissaq kingulleq pinngitsoorusunnerpaagini erseqqissatigaa.

- Inuiaqatigiit qinersinissamik maanna pisariaqartitsinngillat. Tamanna aamma angunianngilara. Ilimagaara neriuutigalugu Inatsisartuni partiinik allanik suleqateqarluta ingerlaqqissinnaalluta, Kim Kielsen oqarpoq.

Periarfissarsiornerit

Taanna paasissutissiilluni oqarpoq, partiip naalakkersuisoqataasut allat marluk siulittaasui, Siverth K. Heilmann (Atassut) aamma Vittus Qujaukitsoq (Nunatta Qitornai), oqarasuaatikkut attaveqarfigisimagini, taakkunanngalu oqaatigineqartoq, suleqatigiinnerup ingerlateqqinnissaa soqutigigitsik aamma mittarfiliortiternissap aningaasalersorneqarnissaanut Danmarkip naalakkersuisuinut isumaqatigiissuteqarnissaq tapersersoritsik.

Tamatuma peqatigisaanik Sermitsiaq.AG-p allanit tusarpaa, Siumumi qullersat aamma partiit illuatungiliuttut angisuut marluk, IA-p aamma Demokraatit, akornanni periarfissarsiortoqartoq.

Inernerineqartariaqartoq tassaavoq Kim Kielsenip naalakkersuisuutitaqarnermi ingerlariaqqissinnaajumalluni Inatsisartuni amerlanerussuteqartunik nutaanik piaakannersumik qulakkeerinnittariaqarnissaa.

- Pisut eqqissilluta tigugallassavavut. Kingusinnerusukkut partiinik attuumassuteqartunik ataatsimeeqateqassaanga, Kim Kielsen oqarpoq.

- Partii Naleqqap aallaqqaammulli naalakkersuisoqatigiinnut ilanngutitinneqarnera kukkunerua?

- Qinersinermi naalakkersuisoqatigiinnik pilersitsinissamut innuttaasunit piginnaatinneqarpunga. Sumilluunniit peqqissimissuteqanngilanga. Danmarkimi naalakkersuisut mittarfiliortiternissanut atatillugu isumaqatigiissuteqarfiginissaat maanna iluatsippoq. Maleruagassanik soorunami malinnissaagut suliallu ingerlariaqqinnerani Inatsisartunik akuutitsissalluta, Kim Kielsen akivoq.

Partii Naleqqamut tunngasut

- Partii Naleqqap sapaatip-akunnerini kingullerni pissusilersorneri qanoq isumaqarfigaagit?

- Pissutsinik ilungersunartunngortitsiniarsimapput. Maanna oqaatigaat, inuiaqatigiinni sanngiinnerpaanut, ilaatigut utoqqarnut, iliuuseqanngitsugut. Tamanna eqqunngilaq. Partii talerpimmut saamimmullu sangujoraarsimavoq. Isornartorsiuinerannili qitiusoq sunaasimava? Qilalugartassaminnik tunineqarsimannginnerat pineqarapa? Tassami piniarnerup nungusaataanngitsumik ingerlanneqartariaqarneranik anguniagaqarlutalu tunngaveqarlutalu sulisarpugut. Naalakkersuisuni immikkut soqutigisanik siuarsaanissaq pineqarnani nunamut tamarmut pitsaanerpaasussaq sulissutigineqartarpoq. Partii Naleqqamut atatillugu taamaattoqarsimanngilaq, Kim Kielsen akivoq.

- Danmarkimi naalakkersuisunut isumaqatigiissut pillugu naalakkersuisoqataasunut Inatsisartunulluunniit ilisimatitsissuteqarsimannginnerit pillugu isornartorsiorneqarputit. Tamatumunnga qanoq oqaasissaqarpit?

- Naalakkersuisut Siulittaasuata Naalakkersuisoqarfianit Danmarkimi naalakkersuisunik suleqateqarneq tamanna pillugu tusagassiorfinnut nalunaarutit arlallit tusarliunneqartarsimappput. Aamma Naalakkersuisuni ulluni pingasuni issiaqatigiissimavugut tamanna oqaluuseralugu. Kisianni aningaasartaliisinnaasimanngilagut, suut tamarmik periarfissaq kingullerpaaq atorlugu aatsaat inissimmata.

Løkke ataatsimeeqateqatigineqassaaq

- Pisut tamakkua tamarmik qaavatigut Lars Løkke Rasmussenilu akornassinni ataatsimeeqatigiittoqassava?

- Aap, aqagu ataatsimeeqatigiinnissaq allanngortinneqassanngilaq.

- Aamma Danmarkip tungaanit aningaasaleeqataanissaq pillugu isumaqatigiissut atsiorneqassaaq?

- Aap, Kim Kielsen akivoq.