qinersineq

Kim Kielsenip qineqqusaarnissaa

Kim Kielsen ullumi Nanortalimmi qineqqusaalissaaq, aqagulu Alluitsup Paanut ingerlaqqissalluni

Kim Kielsen ullumi Nanortalimmi qinersisartunik ataatsimiititsinermi peqataavoq, ullunilu tulliuttuni Kujataani kingornalu kitaani Sisimiuniit Ilulissanut qinersisartunik ataatsimiititsinerni peqataasassalluni.

Naalakkersuisut Siulittaasorigallagaat Kim Kielsen Periusissami Suleqatigiinnissamut isumaqatigiissut EU-mi atsioreerlugu nunatsinnut tikeqqinnermi kingorna qineqqusaaarluni aallartisalerpoq. Taamatut Siumut tusagassiorfinnut nalunaarutikkut paasissutissiivoq.

Kim Kielsen tallimanngormat ullaakkut radioaviisikkut isornartorsiorneqarpoq illoqarfinni anginerusuni qineqqusaarnerni peqataanngippallaarneranik.

Maanna Siumut nassuiaateqarpoq Kim Kielsen sulerisimanersoq.

– Erseqqisaatigissavarput Siumup Siulittaasua Kim Kielsen Naalakkersuisuni Siulittaasuugallartutut nunarput inuilu sinnerlugit pisussaaffinik suliassaqartuarmat tamakkulu eqqummaariffigalugit ingerlallugit. Soorlu tusagassiutitigut aamma arajutsineqanngitsoq Naalakkersuisut Siulittaasuattut Kim Kielsen EU-mi Periusissami Suleqatigiinnissamut isumaqatigiissummik atsioriartorluni Bruxellesimut angalavoq, sisamanngornermilu 30. oktober Nuummut tikeqqippoq, partii tusagassiorfinnut nalunaarutikkut nassuiaavoq.

Nuummut tikereernermi kingorna Siumup siulittaasua tallimanngormat Kujataaliarpoq, taqqavani kujataani Nanortalimmiit avannaani Paamiunut qinersisartunik ataatsimiititsinerni peqataasassalluni.

Pilersaarutit imatut isikkoqarput:
Nanortalik 1. november
Alluitsup-Paa 2 november
Qaqortoq 3. november (TV-kkut)
Narsaq 4. aamma 5. november
Paamiut 7. november

Taassuma kingorna 10. nov.-imiit avannamut Ilulissat angullugu angalassaaq, tikitassallu assigiinngitsut angussallugit, assersuutigalugu: Sisimiut, Aasiaat, Kangaatsiaq, Qasigiannguit aamma Ilulissat. Angalanissamut pissutsit apeqqutaallutik allanik aamma tikitaqarnissaa kingusinnerusukkut nalunaarutigineqassaaq, partii paasissutissiivoq.

Uummannami novembarip 10-anni Upernavimmilu novembarip 11-anni qinersisartunik ataatsimiititsisoqassaaq.

Powered by Labrador CMS