Kim Kielsenip qineqqusaarneq aallartippaa

Naalakkersuisut siulittaasuata, Kim Kielsenip, (S), ukioq 2018 qinersiviusussaasoq ukiortaami oqalugiarnermini tamanit paatsoorneqarsinnaajunnaarlugu ersersippaa. Tamannalu ukiortaami oqalugiaataata aallartinnerani naqissuserneqarpoq.

- Ukiumi aallarnikkatsinni Inatsisartuni ilaasortassatsinnik qinersisussaavugut. Qinersinerup kingulliup kingorna tassa ukiut pingasut sinnerlugit ingerlareerput, naalakkersuisooqatigilertakkavullu politikkikkut suleqatigiilluarfigalugit ulapiffigisimavagut, Naalakkersuisut siulittaasuat oqarpoq.

- Mattussuinata
Namminiilivinnissamut oqallinneq ukiup aappaata affaani oqallinnermi initusimavoq. Oqalugiaammili taama initutiginngilaq.

- Namminiilivilluta pituttorsimajunnaarnissarput tamatta qamaniittuutigisarparput, inuiannimi kikkunniluunniit kissaataasarpoq qulangersimaneqarani inuunerup nammineq oqartussaaffiginissaa. Siumulli alloriarnerit angisuut aalajangersaavigitinnagit nunatsinni sanngiinnerpaat puigornagit eqqarsaatigisariaqarpavut, Kim Kielsen (S) oqarpoq.

Kim Kielsen (S) tamatuma kingorna ataatsimoornissamut kaammattuuteqarpoq.

- Namminiilivinnissamut aningaasaannaat apeqqutaanngillat. Namminiilivinniarutta pineqarputtaaq kinaassuseq, naleqartitat kiffaanngissuserlu. Eqqarsaatigilaariarsiuk qanoq angusaqartigisinnaagaluartugut mattussuinata inoqatitsinnik ilaserinninnerusuugutta. Aammalu qanoq angusaqartigisinnaagaluartugut immitsinnut nersualaarnerusuugutta uparuartuutiinnarata. Upperaara inuiaqatigiiulluta nammaqatigiinnitsigut, tapersersoqatigiinnitsigut ataatsimoorussinitsigullu naligiinnerusumik immitsinnullu naleqartinnerulluta angusaqarluarnerusinnaasugut.

Sumiiffimmi najugallit sulissasut
Oqalugiaammilu annertunerusumik qaqilerneqalerput suliniutit pitsaasut - ilaatigut sanngiinnerusunut - Kim Kielsenip isumaa naapertorlugu Naalakkersuisunit ingerlanneqarsimasut.

Assigiimmik akeqartitsineq, nammineerluni illuliornissamut periarfissat pitsaanerusut, inunnik isumaginninnermi innarluutilinillu sullissinermi iluarsartuussinerit kiisalu utoqqalinissamut ileqqaagaqarneq ilaatigut oqalugiaammi eqqaaneqarput.

Kim Kielsenip inuttaasut piginnaanngorsarnissaannut sulinissamullu kajungerinninnerulernissaannut suliniutigisatik aamma tikkuarpai.

- Suliniutit tamakkua qulakkeerinneqataaffigissavaat ukiuni aggersuni sumiiffimmi najugallit sulisoralugit sapinngisamik siuarsaanissaq. Taamaaliornerup inuiaqatigiit, suliffiit, kommunillu iluaqusissavai, inuiaqatigiinnilu assigiinngitsunik atugaqarnermik nalimmassaaqataassalluni.

Meeqqat atugaannut kiisalu meeqqat atuarfiannut tunngatillugu Naalakkersuisut siulittaasuata suli suliassarpassuaqartoq naqissuserpaa.

Aalisarnermut inatsisissaq illersorneqanngilaq
Aningaasarsiornikkut isaatitsivissatut nutaatut Kim Kielsenip mittarfissat nutaat, takornariaqarneq aatsitassanullu akit nutaat pitsaanerusut ilaatigut isumalluarfigalugit oqariartuutigai.

Inatsisissatulli siorna siunnersuutigineqartuni oqallisigineqarnerpaaq, tassalu aalisarnermut inatsisissaq, pillugu Kim Kielsen qanoq isumaqarnerluni ersarissaanngilaq.

- Aalisarneq nunatta inuussutissarsiutaasa pingaarnersaraat, taamaattuassaarlu ukior-passuarni. Taamaattumik pissanngatigalugu utaqqivara Inatsisartut aalisarnermut inatsisissaata nutaap qanoq inerneqarnissaa. Inatsisissamut siunnersuut inuiaqatigiinni tusagassiuutinilu oqallisigineqaqaaq. Oqallinnerlu taanna allaqquttussaanngilaq, tassami suliap nunatsinni inuppassuit suliffeqarfippassuillu assigiinngitsutigut sunnertussaammagit, Kim Kielsen oqarpoq.

Oqalugiaannilu naggaserlugu ataatsimoornerunissamut kaammattuuteqaqqippoq.

- Ilungersussaagut nunatta siuariartornissaa ineriartornissaalu pillugit. Sanngeequtivut kukkusarnivullu kisiisa piunnaarlugit ataatsimoorluta tapersersoqatigiilluta meeqqatsinnut immitsinnullu kaammattortarluta siumut ingerlassuugut.