Kim Kielsenip ministeriunermik ataatsimeeqateqarnini iluarisimaarpaa

Naalakkersuisut siulittaasuata Kim Kielsenip ministeriuneq Helle Thorning-Schmidt Naalakkersuisut siulittaasuattut ivertinneqarnermi kingorna siullermeerluni pingasunngornermi ataatsimeeqatigaa.

- Nuannersumik pilersitsiviulluartumillu ataatsimeeqatigiippugut, tassani pissutsit maannakkorpiaq pingaarnerpaat ilai oqallisiginissaannut periarfissaqarluta. Eqqartukkatta ilagivaat Naalakkersuisut maannakkut politikkikkut aningaasaqarnikkullu pingaarnersiuinerminni salliutitaat, Pituffimmi Sakkutooqarfimmi kiffartuunneqarnissamut isumaqatigiissut aammalu urani pillugu ataatsimoorluni suliaqarneq, Kim Kielsen oqarpoq.

Namminersorlutik Oqartussat paasissutissiinerat najoqqutaralugu Kim Kielsenip Kalaallit Nunaata aningaasarsiornikkut inissisimanera ministeriunermut ilisimatitsissutigaa, tassani Naalakkersuisut aningaasarsiornikkut aaqqissuusseqqinnissanut pilersaarutaat, suliniutit naammassisassallu aggersut, soorlu sanaartornermut, suliffeqarnermut, ilinniartitaanermut, takornariaqarnermut isumaginninnermullu tunngasut nassuiaatigalugit.

- Oqaatigisinnaavara Naalakkersuisut danskit naalakkersuisuinik pitsaasumik angusaqarfiulluartumillu suleqateqarneq pingaartimmassuk, taamaattumik sapaatip akunnerani matumani danskit naalakkersuisuini suleqatitsinnik ataatsimeeqateqarnissarput siunertarlugu naalakkersuisuni ilaasortat arlaqarluta Danmarkimiippugut.