Namminersulivinniarneq

Kim Kielsenip eqqissisimasumik sulinini takutippaa

Nammineernerulernissamut aqqut ingerlaffigaarput. Naalakkersuisut siulittaasuat Kim Kielsenip Aleqa Hammondimut taamatut oqariartuuteqarpoq

Naalakkersuisut siulittaasuat Kim Kielsen

(Kim Kielsenip oqaaseqartinneqarneranik imaqartumik allaaserineqartoq nalunaaqutaq 12.21 ilaneqarpoq)

- Qanorluunniit politikkikkut tunuliaqutaqaraluarutta nunatta ullut arlaanni namminersulivikkumaarnissaa amerlanerpaartatta uummatitsinni qaammarissumik tillertuartoq nalinginnaasumik ilisimaneqarpoq.

Naalakkersuisut sapaatip akunneranoortumik tusagassiortunik katersortitsinerani ilaatigut taama Kim Kielsen oqarpoq.

Namminersulivinnissamik sulinerup kigaallisarneqarsimanera pillugu Aleqa Hammond isornartorsiuereersoq, Kim Kielsen eqqissilluni politikkimik ingerlatsivoq.

Namminersulivinnissaq angorusuppaa, kisianni tuaviuussaasumik suliaq ingerlassanngitsoq oqaatigalugu.

- Tamanna ukiorpassuarni sulissutigaarput. Siullermik Namminersornerulerneq piviusunngortinneqarmat 2009-imilu Namminersorneq atuutilermat suli siumut alloriaqqippugut, taanna uannut pingaaruteqarnerpaavoq, Naalakkersuisunut siulittaasoq oqarpoq.

Maannakkut siusippallaarpoq
- Siunissaq meeqqatta pigaat. Uagut, kinguaariinni aalajangiinivut, kinguaariit tulliisa atugarisassaraat inuuniutigisussaallugillu. Kinguaariilli tulliisa inuiaqatigiit nammineertut piviusunngortittussaavaat. Taamaammat kinguaariit tulliisa qaqugu qanorlu namminiilivinnissaq piviusunngortinneqassanersoq namminneerlutik aalajangertariaqarpaat.

- Aleqa Hammondip Facebookikkut isornartorsiorneqarnerit qanoq oqaaseqarfigisinnaaviuk?

- Oqaatiginikuusakka tusagassiortunit ingasaallugit saqqummiuppaat tamanna Aleqa Hammondip qisuariaateqarfigaa. Namminiilivinniarnermi unikaallattoqarnavianngilaq. Nunanut anguniagassarpassuaqarpugut, ataatsimulli aqqut ataaseq atussavarput.

Suleriaaseq
- Namminersornerulereernitta Namminersulereernittalu kingorna Namminiilivinnissaq qanilliartuinnarparput. Pisoq sukkatseriasaarsinnaallunilu arriillisinnaasarpoq. Namminiilivinnissamut aqqummi anguniakkat assigiinngitsut nalaattarpagut qaangerniagassagut, Kim Kielsen oqarpoq.

Namminersulivinnissap unitsinneqarallarnera aviisimi qulequttamiippoq, tamannalu Kim Kielsenip toqqaannartumik oqaatiginikuunngilaa.

Powered by Labrador CMS