angerlarsimaannartut
Kim Kielsenip apeqqarissaarfigineqarnerani ataatsimiittarfik inoqarpianngitsoq
Inatsisartut ataatsimiittarfiat pingasunngornermi inoqarpianngilaq. Naalakkersuisut sipaarniarnissamik siunnersuutaata pingajussaa oqaluuserineqarnissaa kinguartinneqarpoq
Aningaasanut inatsisissatut siunnersuut aamma Pituffimmut suliarinnittuussinissaq pillugu politikkerinit isumaqatigiinngissutaagaluaqisoq, Inatsisartut pingasunngornermi ataatsimiinnerat inoqanngingajavippoq.
Sisamat ataatsimeeqataasut
Oqaluuserineqartut pingaaruteqartut Inatsisartuni oqaluuserineqangaata inuppassuarnik ulikkaartaraluarpoq. Inuit ikitsuinnaat ataatsimiittarfimmiinnerat assimi takuneqarsinnaavoq.
Kim Kielsen saniatigut Inuit Ataqatigiinnit Sara Olsvig aamma Agathe Fontain kiisalu Partii Naleqqamit Hans Enoksen aamma Per Rosing-Petersen ataatsimiittarfimmiipput. Oqallinnerup naammassilernerani inuit amerlinerulaarput.
Oqaluuserineqartoq kinguartinneqarpoq
Kim Kielsen apeqqarissaarfigineqareermat aningaasaqarnermut naalakkersuisoq Demokraatineersoq Anda Uldum oqaluttarfimmit oqaluppoq. Naalakkersuisut sipaarniarnissamut aningaasanut inatsimmi pingajussaata oqallisigineqarnissaa kinguartippaat maajip aqqaneq aappaanni oqallisigineqartussanngorlugu.
Naalakkersuisut siulittaasuata Kim Kielsenip apeqqarissaarneqarnerani illuatungiliuttuni partiini siulittaasut kisimik apeqquteqarsinnaatitaapput.